1555/2023-2024

Kolasib dated 17th August 2023: Vawiin chawhnu khan DC Conference Hall, Kolasibah MLA inthlanpui 2023 kalpui chhung a thuthar thehdarhna hrang hrang hman dik lohna a awm loh nana a thlithlaitu tur,’Media Certification & Monitoring Committee’ chuan thutkhawmna an nei a. Pu John LT Sanga, Deputy Commissioner, MCMC Chairman ni bawk chuan hun kaihruaiin Political party hrang hrang ten inrualkhai tak a Chanchinbu, Cable Network leh Social media an hman theih dan turte leh hemi kaihhnawih a an senso tur bithliah zat chhinchhiah dan turte sawi ho a ni.

Pu John LT Sanga, Deputy Commissioner chuan khawvel thiamna thang zel avangin thutharlakkhawm leh thehdarhna kawng pawh a tamin a chak tawh hle thu a sawi a, heng thu lengvak hrang hrang kar ah hian thu rintlak leh belhchiandawl thlitfim thiam a pawimawh hle thu a sawi. MLA inthlanpui 2023 lo awm tur ah pawh Chanchinbu, Cable network leh Social media-te uluk tak a thlithlai a pawimawh thu sawiin chu mawhphurna kengkawh tur chuan Election Commission of India thuchhuah angin Media Certification & Monitoring Committee chu din a nih thu a sawi.

Vawiin thutkhawmnaah hian Political party hrang hrang ten Chanchinbu leh Cable Network kaltlanga, rualkhai tak a Campaign an kalpui theih nana hmalak dan tur te, heng thutharthehdarhna hrang hrang an hman kawnga an senso chhinchhiah dan turte rel a ni a. Social media hrang hrang vil dan turte rel a ni bawk. MCMC Chairman hi Pu John LT Sanga, Deputy Commissioner niin Pu Hmingthanzuala, DIPRO chu Member Secretary a ni a. Pi Melody Ngurthantluangi, Addl. DC, Dr. Blessa Sailo, Sr.Scientist, ICAR, Pu Andrew VL Auva, President, MJA leh Pu R.Lalhmingthanga, Editor, FOCUS Programme-te chu member an ni.