1554/2023-2024
Aizawl, the 17th August, 2023: Kum tin August ni 20 a ram pum huapa hman thin, Sadbhavana Diwas chu naktuk August ni 18 (Zirtawpni) hian Sawrkar Office tinah hman a ni dawn.
Sadbhavana Diwas hi ram chhung mipui hmun hrang hranga chengte, sakhaw hrang hrang vuantu leh tawng hrang hrang hmangtute inkarah inpumkhatna leh inremna chawilar a nih theih nana kum tina hman thin a ni a. Tharum thawhnate hawisana induhsaktawnna chawilar tura hmalak chu a thuken pawimawh tak a ni.
Kuminah erawh August ni 20 hi Sawrkar Office chawlh ni, Pathianni a nih avangin August ni 18, Zirtawpni-ah Sadbhavana Diwas hi hman a ni dawn a ni.
Naktuk August ni 18 (Zirtawpni) chawhma dar 11-ah Mizorama Sawrkar Office thawktu zawng zawngte chu Head of Department hovin he ni puala hun hmang a, thutiam (Sadbhavana pledge) sawiho tura beisei an ni a. Civil Secretariat, Mizoram New Capital Complex (MINECO), Khatla-a Officer leh Staff-te chu Chief Secretary hovin he hun hi Secretariat Building tualzawla hmang tura beisei niin, Chief Secretary kaihhruaiin Sadbhavana Pledge sawirual a ni ang.
