1553/2023-2024

2023 Thlazing ni 17: Nimin tlai khan Social Welfare & Tribal Affairs Minister Er Lalrinawma hovin Lawngtlai DC Conference Hall-ah District Level Task Force on Ruihhlo Do chu an ṭhu khawm a. Lawngtlai District chhunga ruihhlo do kawnga hma lakna hrang hrang an thlir ho.

Excise & Narcotics Minister Er Lalrinawma chuan sawrkar hma laknain ram pumah ruihhlo do beihpui thlak mek a nih thu sawiin, ruihhlo do chu kawng thum - a lut tur tihtlem, mamawhna tihtlem leh a ti mekte chhan chhuah kawngah te hma lak a ni, a ti a. Tunlaiin ruihhlo chi khat, No. 4 chuan Mizoram pum a tuam mek a, thingtlang kilkhawr thlenga a luh chilh tawh avangin thapui chhuaha do a ngai tiin, ruihhlo tam tak man a ni tawh chunga a kiam hlei thei lo chuan ṭan rualna nena do a ngaihzia a lan chiantir hle a ni, a ti a. Vawiinah kan chhungkua kan la fihlim a nih pawhin, kan kawtkaiah a awm reng tih pawm i la, tu mah ral bang bik lovin ruihhlo do kawngah nasa zawkin ṭan i la zel ang u, tiin Lawngtlai District mipuite chu a sawm a. Lawngtlai District-a ruihhlo do kawnga hma latu, sawrkar department leh tlawmngai pawlte chu fakawm a tih thu sawiin, sawrkar pawhin a tih theih ang ang ti turin ke a pen zel dawn a ni, a ti.

Mizoram Legislative Assembly Deputy Speaker Pu H. Biakzaua chuan Lawngtlai District chu ram dang nena ramri thui tak inṭawm a nih angin ruihhlo luhna kawngka remchang tak a nih avangin invennaah uluk zawka hma lak a ngaih thu sawiin, hrmi kawnga Young Lai Association hma lakna chu a chhuanawm tak zet tih a sawi a. YLA Sub-Headquarters Sangau te'n ruihhlo do nan a ṭul anga an hman atan ₹ 20,000/- a lo pek tawh bakah, he meeting-ah hian Central YLA hnuaia ruihhlo dotu Drug Reduction Squad (DRS) te ṭanpui nan ₹ 50,000/- a hlan bawk.

He ṭhut khawm hi Lawngtlai Bawrhsap Pu H. Lalhmingthanga'n kaihruaiin, ruihhlo do kawnga hma latu hrang hrangte'n an hma lakna report an pe a. Hma lak zelna tura rawtna hrang hrang sawi ho a nih bakah, kal khawmte chuan Lawngtlaia Excise & Narcotics Department-a thawktu indaih lo lutuk dah belh ṭul an tih thu te, Lairam Rescue Centre chu sawrkarin pawmpui se an duh thu te an sawi lang a ni.

Excise & Narcotics Minister hova Lawngtlaia "Review Meeting on Ruihhlo Do" buatsaihah hian District Administration-a official-te, ruihhlo do leh a kaihhnawiha hma lakna kalpuitu sawrkar department leh tlawmngai pawl hruaitute, Village Council Association hruaitute leh MJA Lawngtlai District hruaitute an tel a ni.