Vawiin khan Lawngtlai DC Conference Hall-ah tun thla ni 23-a Lok Sabha Inthlanpui vote chhiar tura media-te mawhphurhna inhrilh hriatna hun buatsaih a ni.

Sub-Deputy Commissioner Pu Lalsanglura, IT Applications-a Nodal Officer chuan Lawngtlaia chanchinbu mite leh Election-a media lama mawhphurhna nei kal khawmte chu zirtirin, vote chhiar huna an tih tur leh tih loh turte kimchang takin a hrilhfiah a. Control Room-cum-Media Centre siam a nih tur thu leh mipuite'n inthlan result chhiar chungchanga an hriat duhte an zawh theihna tur telephone pathum, constituency pathum tan a hran theuhva dah a nih tur thu a sawi a. Counting Hall chhunga video hmanga thlalak bak, thlalak pangngai phal a nih dawn loh thu a sawi lang bawk.

May ni 23-a Lawngtlai District chhunga assembly bial pathuma vote tlate chhiarna tur hian Govt Lawngtlai College-ah counting hall pathum ruahman niin, Tuichawng leh Lawngtlai West biala vote tla chhiarna tur counting hall-ah dawhkan sawm (10) ve ve hun a ni ang a, he'ng bial pahniha vote tlate hi round sarih (7)-ah chhiar zawh tura ruahman a ni. Lawngtlai East bial counting hall-ah dawhkan paruk (6) hun a ni ang a, round ruk (6)-ah chhiar zawh tura ruahman a ni.

Tun tum Lok Sabha inthlana vote tlate chhiar hunah hian assembly constituency tinah polling station panga theuhvah VVPAT-a vote tla chhinchhiahte chhiar tel a ni dawn a.

Lawngtlai District Election Officer kaihhruaina hnuaiah felfai taka vote chhiar a nih theih nan ruahmanna hrang hrang kalpui mek a ni.