General Elections to Lok Sabha, 2019 vote chhiarna atana inpuahchahna kal mekah vawiin khan Model Counting Hall, Assembly Annexe, Aizawl ah Counting Returning Officer, Asst. Returning Officer leh official dangte tan Hands-on Training on Counting of Votes from EVMs and VVPAT slips neih a ni.

He training hi Pu Ashish Kundra, CEO, Mizoram chuan hawngin Mizoram ah fel fai taka vote kan thlak tawh ang bawkin vote chhiarna fel fai tak neih a tul thu a sawi a, Supreme Court thuchhuah angin kumin Lok Sabha inthlanah hian Assembly Constituency tinah VVPAT panga zel chhiar a ngaih thu leh heng VVPAT chhiar  tur te hi vote chhiar ni ah a draw of lots hmanga pawh chawp tur anih thu a sawi a, hei hian vote chhiar hun chhung a tihrei dawn avangin official te chu vote chhiar ni ah muangchang lo leh inthlahdah lova ruahmanna fel taka siam turin a chah a ni.
VVPAT leh EVM chhiar dan chungchang zirhona hi Chief Electoral Officer’s Office (CEO) leh Aizawl District Election Office tangkawp buatsaih a ni a, Hands-on Training anih angin EVM leh VVPAT khawl te nen vote chhiar dan hi District Level Master Trainers (DLMT) ten an zirtir a ni. Pu Mohan Krishna Uppu , Addl CEO  , Pu H. Lianzela, Jt CEO, Nodal Officer i/c Training ni bawk, , Pu CC Lalchhuangkima, Deputy CEO leh Pu Malsawmzuala Asst. CEO leh election official dangten an hmanpui a, chawhnu lamah evaluation test neih nghal a ni. Vawiin Training ah hian Mizoram District hrang hrang atangin Counting Returning Officer,  Asst. Returning Officer leh official te an tel a ni.

VVPAT leh EVM chhiar dan training hi tun kar atang hian District hrang hrangah neih chhunzawm tur a ni.

Ram chhung hmun dang angin Mizoram ah pawh Lok Sabha inthlana vote tla te hi May ni 23, 2019 zing dar 8 atangin Counting Hall ah  chhiar a ni ang.