Vawiin khan Mizoram Youth Commission (MYC) huaihawtin Lawngtlai Bazar YLA Hall-ah Youth Summit & Road Show buatsaih a ni a. Thalaite'n an hlut hle.
A hawnna inkhawm tawi buatsaihah Khuallian, Lawngtlai East Bialtu MLA Pu H. Zothangliana chuan Mizoram Youth Commission chu Mizo thalaite'n ei zawnna leh hna nghet an neih theihna tura din a nih thu sawiin, MYC kal tlangin thalai eng emaw zat chu ei zawnna hmuhsak an ni tawh, a ti a. Thalaite chu ram nghahfak an nih avangin, sawrkar chuan thalaite tana khawvel thar siam chu a tum ber a nih thu sawiin, ram hma hun chu an kutah a awm a, an nunin a zir loh chuan ram tichhiaa timualpho thei an ni tih hre reng turin zirlai kal khawmte chu a fuih a ni.
Khual zahawm LADC CEM Pu T. Zakunga chuan mihringte'n kan tui zawng ei zawnna tur kan thlan thiam a ngai a, chuti ang inkawhhmuhna Lawngtlaiah ngei buatsaih a ni chu lawmawm a tih thu sawiin, Youth Summit chu thalaite'n hlawk taka an hman a beisei thu a sawi.
He Youth Summit hawnna inkhawm hi Lawngtlai DHO Pu L. Lalhmingmawia Pachuau chuan a kaihruai a. Youth Commission Officer Pu Ronald Lalchhuanawma chuan Youth Summit leh Road Show-in a tum te sawi fiahin, Mizoram Youth Commission hma lak tawhna leh hma lak zel dan tur a sawi nghal bawk.
Lawngtlaia Youth Summit neih hi zirlai naupang mai bakah, nu leh pa thahnem takin an tlawh a. Stall 27 hawn niin, he'ng stall hawnte hi ni lengin a lun hle hlawm a ni.
