Vawiin khan Lawngtlai District Level Co-ordination Committee on National Deworming Day chu an Chairman, Lawngtlai Bawrhsap Dr Andrew H. Vanlaldika hovin DC Conference Hall-ah an thu khawm a, National Deworming Day (NDD) February Round 2021  kalpui dan tur an sawi ho.

National Deworming Day hi kum tin vawi hnih, February thla leh August thlaah te hman thin a ni a. Kumin National Deworming Day February Round hi February ni 22 atanga February ni 26 inkar chhunga hman tur niin, naupang kum 1 atanga kum 19 inkarte chu rulhut hlo (Tab. Albendazole) eitir vek tur a ni a. Naupang kum 2 hnuai lamte chu mum chanvea eitir thin niin, kum 2 chung lamte chu mum khat pek thin an ni a. Kum danga zirna in leh anganwadi centre bakah, an ina kal chilha pek thin chu COVID-19 hri leng avanga zirna in leh anganwadi centre a inhawn rih loh avangin in tina kal chilha pek turin ruahman a ni.

Kumin NDD February Round-a rulhut hlo pek tur atan hian Lawngtlai District chhungah kum 1 leh kum 19 inkar target 50,311 an awm.

Vawiin thut khawmah hian Lawngtlai Chief Medical Officer Dr LP Malsawma leh District Immunisation Officer Dr S. Thaizi te bakah, health lama thawktu dangte, education lam leh social welfare lam ai awhte an tel a ni.