No.7531/2020-2021

Core Team on Skill Development Framework Hnahthial District buatsaihin vawiin khan KVK Training Hall, Hnahthial-ah  Ni 15 chhung awh tur Ar vulh training hawnna hun hman niin Hnahthial District bawrhsap Pu Vanlalmawia chuan khuallian niin a hawng a, "Khawvel hi thiamna neite ta a ni" a ti.

Khawvel changkang chho zelah skill development a pawimawh thu leh Sorkar laipui pawhin Skill India Mission a kalpui thu District Bawrhsap Pu Vanlalmawia chuan sawiin "engemaw hi kan thiam a ngai a, kan thiamna chu eizawnna tham nisela, thiamna hmanga eizawnna hi a tha a ni" tiin thlarau lam tih lohah khawvelah hian eizawnna a pawimawh ber thu leh Eizawnna chu  hluin a zahawm tih a sawi bawk. Trainee te chu mahni insenso ngai lova sorkarin a thiamna pek dawn avanga a lawmpui thu hrilhin tih tak takna nen training turin a chah bakah thawh hona tha neiin Commercial farmer ni thei tura inbuatsaih turin a fuih bawk a ni.

He hunah hian Core Team Member Secretary Dr.K.Lalzuimawia tarlan danin MYC sum pek Rs. 900,346/- hmangin Govt Hnahthial College-ah NSQF Level 4 tlukpui Cement Mistiri Training kalpui mek a nih bakah Vawiin atang hian mi 20 ten KVK Hnahthial, AH & Vety dept., Hnahthial leh School of Agriculture Science (SAS), Hnahthial-a a mithiam te kaihhruaina hnuaiah Arvulh training hi kalpui leh tur niin Ni 1.3.2021 thleng a awh dawn a ni.

Hnahthial-a Skill Development traning on Poultry Farming hawnna inkhawm hi Pi Zonunkimi Ralte, i/c Sr.Scientist & Head KVK Hnahthial chuan kaihruaiin Dr.C.Lalremruata, SMS (Animal Sc) chuan training an kalpui dan tur hrang hrang tarlangin Core team member Pu Vanlalhnema chuan thu a sawi bawk a ni.


Attachment

  • Loading attachment...