1564/2022-2023

Thlazing ni 11, 2022: Vawiin khan Lawngtlai District Level Co-ordination Committee on National Deworming Day chu an Chairman, Lawngtlai Bawrhsap Pu Amol Srivastava hovin DC Conference Hall-ah an ṭhu khawm a, National Deworming Day (NDD) Second Round 2022 kalpui dan tur an sawi ho.

National Deworming Day hi kum tin vawi hnih, February thla leh August thlaah te hman ṭhin a ni a. Kumin National Deworming Day Second Round hi kum danga hman ṭhin hun aia tlai hret, September ni 2 aṭanga hman ṭan tura ruahman a ni a. Naupang kum 1 aṭanga kum 19 inkarte chu rulhut hlo (Tab. Albendazole) eitir vek tur a ni a. Naupang kum 2 hnuai lamte chu mum chanvea eitir ṭhin niin, kum 2 chung lamte chu mum khat pek ṭhin an ni a. Rulhut hlo hi zirna in leh anganwadi centre-ah te pek leh tura ruahman niin, chumia hmaihte chu an ina kal chilha pek leh turin ruahman a ni.

Kumin NDD Second Round-a rulhut hlo pek tur atan hian Lawngtlai District chhungah kum 1 leh kum 19 inkar target 66,749 an awm a. NDD Second Round bul ṭanna leh hawnna hun hi September ni 2, 2022-ah Don Bosco School-ah hman tum a ni.

Vawiin ṭhut khawmah hian Lawngtlai Chief Medical Officer Dr LP Malsawma leh District Immunisation Officer Dr S. Thaizi te bakah, health lama thawktu dangte, ICDS lam leh sikul hrang hrang Principal leh Headmaster-te an tel a ni.

Attachment

  • Loading attachment...