3287/2022-2023

Pawlkut thla ni 18, 2023: India rama kum tin January ni 24-a hman ṭhin, National Girl Child Day (NGCD) puala hun hman tur hawnna hun chu vawiin khan District Programme Officer (ICDS), Lawngtlai District leh Child Development Project Officer (ICDS), Lawngtlai Project te ṭang kawp huaihawtin Lawngtlai DC Conference Hall-ah hman a ni a. Lawngtlai Bawrhsap Pu Amol Srivastava chuan Khuallian niin a hmanpui.  

Lawngtlai Bawrhsap Pu Amol Srivastava chuan India ram hmun tam takah hmeichhiate'n en hran leh thliar hran an hlawh nasain, an nun pawh a chep hle tih a sawi a, Mizoramah erawh state dang nena khaikhinin hmeichhiate dinhmun a zia hle tih sawiin, anmahni venhim, dawm kan leh an chanvo dik tak an hmuh theih nana ṭanpui kawngah erawh theih tawp chhuah zui zel a ṭul a ni, a ti a. Hmeichhia vanga piang leh sei lian kan nih hre renga zah taka hmeichhiate en a pawimawh tih sawiin, official-te leh tlawmngai pawl ai awh kal khawmte chu District chhunga hmeichhiate dinhmun chawi kan kawngah theih tawp chhuaha hma la zel turin a chah a. Inchhungkhur, zirna leh hna thawhna hmunah te hmeichhiate dikna chanvo humhalhsak a ṭul thu sawiin, a bik takin hriselna kawngah hmeichhe naupang leh tleirawlte hriselna ngai pawimawh a, an mamawh ngaihtuahsak leh phuhruksak tura hma lakna kalpui zel turin thawktute chu a chah bawk.

Lawngtlaia NGCD lawmna hawnna hun hi DPO office-a District Programme Coordinator Pi F. Lalengvari'n kaihruaiin, hun hman chhan leh kar tluana hun hman chhoh dan tur a sawifiah a. DC office-a Superintendent Pi Malsawmtluangi kaihhruaiin kal khawmte'n Beti Bachao Beti Padhao (BBBP) hma lakna - hmeichhe naupang chhanhim leh lehkha zirtir kawnga ṭanpuitu ni tura intiamna an chham rual a. DPO office-a District Programme Assistant Pu Z. Laldinhuala kaihhruaiin NGCD thutiam leh press release chhiar rual a ni bawk a. NGCD pual hian kal khawmte'n an intiamna nem ngheh nan white board-ah hming an ziak bawk.

Vawiina Lawngtlaia NGCD hawnna hunah hian ICDS hnuaia thawkte bakah, district administration official-te, CMO, DIPRO, District Child Protection Unit (DCPU)-a thawkte, One Stop Centre (OSC)-a thawkte, Lai Women Association (LWA) General Headquarters leh Mizo Hmeichhe Insuihkhawm Pawl (MHIP) Lawngtlai Sub-Headquarters-a hruaitute an tel a ni.

National Girl Child Day hi January ni 24 ni mah se, a pualin kar khat awh hun hman ṭhin a ni a. Kuminah pawh Ministry of Women & Child-in a duan lawk angin January 18 - 24, 2023 inkar chhungin he ni pual hian hun hman dan tur kawng hrang hrang ruahman leh a ni a. January 19-ah Lawngtlai District VC Association, DCPU leh OSC te nen Special Gram Sabha kovin, hmeichhiate himna chungchang leh thiamna kawng hrang hranga hmeichhiate chawi kan chungchang zir hona buatsaih a ni ang a. January 20-ah Ekalavya Model Residential School-ah infiamna kawnga hmeichhiate hmasawnna tur inzirtirna leh slogan writing competition buatsaih a ni ang a. January 23-ah TV-ah women & child welfare scheme chungchang talk show buatsaih tum niin, January 24-ah a kharna leh infiamna lama hmeichhe che ṭhate (local girl champion) chawimawina buatsaih a ni ang a. January 24, 2023-a District Hospital-a nau piang thar hmeichhiate hnenah naute enna (lawmpuina certificate leh pawisa fai ₹ 2,000/- leh puakpuan) hlan a ni bawk ang.

Attachment

  • Loading attachment...