Vawiin khan Lawngtlai District Legal Services Authority chuan Lawngtlai District Court-ah National Lok Adalat thut khawm an buatsaih.

Lawngtlai DLSA Secretary Pu BT Lala Sakachep MJS hova he Lok Adalat thut khawmah hian case lut 254 zinga 86 chu chin fel a ni a. He'ng case chin fel takte hi bank loan vek a ni a. Chin fel bakte pawh thut khawm leh huna la ngaihtuah leh zel theih a ni.

National Lok Adalat hi 'mipui court' tih a ni a. National Legal Services Authority huaihawtin hun bi neiin, India ram pumah a ruala thut thin a ni. Lok Adalat-ah hian court-a thubuai kal lai, a inkhingate inbiakremnaa chalrem theih mai tura lang chi te put luh a ni thin a. Man chawi lova thubuai neite an inkhin theihna hmun a nih bakah, a inkhinga te inbiakremna ang chauh zelin thu rem a ni thin.