Vawiin khan National Voters' Day vawi 8-na chu Lawngtlai DC office tualah District Election Officer, Lawngtlai DC ni bawk Dr Arun T., IAS hovin hman a ni.

Bawrhsap chuan democracy ramah chuan vote thlak hi kan chanvo leh mawhphurhna a ni tiin, mipuite’n zalen taka duh zawng kan thlan hi sawrkar tha siamna atan a pawimawh a ni, a ti a. Inthlan kum a nih angin, kum tling chin tawh phawt chu roll-a an luh a, vote an thlak vek theih nana tan la turin kal khawmte chu a sawm a. EPIC siam tharte chu BLO-te hnenah a sem nghal bawk.

He hun hi Election Officer Pu Lalrinawma MCS chuan a kaihruai a. Report ngaihthlak niin, NVD thu tiam sawi rual a ni a. AERO Dr Andrew Lalremruata MCS chuan Chief Electoral Officer thuchah a chhiar chhuak a. Political party hrang hrang ai awh te'n thu an sawi bakah, zaithiam zai ngaihthlak a ni a. ERO/SDO(S) Pi Rochuangkimi Khenglawt MCS chuan lawm thu a sawi zawhin, National Anthem hmangin hun khar a ni.

Vawiina Lawngtlaia NVD hmannaah hian Election lam buaipuitu ERO, AERO, BLO leh staff-te bakah, politcal party hrang hrang ai awh te, tlawmngai pawl ai awh leh zirlai naupangte an kal khawm a ni.

Final E/Roll-a a lan chuan tun dinhmunah Lawngtlai District chhungah voter 79207 (mipa 39581 leh hmeichhia 39626) an awm mek a. September 2017-a tlangzarh Draft Roll atanga Final Roll-a voter punna hi 1483 a ni a; 1.91%-a pung ang a ni.