Vawiin khan Health Minister Pu Lal Thanzara chuan Ramhlun South YMA Hall-ah ABCI Infrastructures Pvt. Ltd. ten Corporate Social Responsibility (CSR) hnuaia Ramhlun South Branch YMA ruang phurhna Morgue Van an pek inhlanna a hmanpui.

Minister Pu Lal Thanzara chuan khawtlang mipui leh chhiat tawh a buaipuitu ber YMA te tana tangkai tak tur ruang phurhna lirthei ABCI Infrastructures ten CSR kaltlanga an pe chu lawmawm a tih thu a sawi a. Mizoram chhunga company hrang hrang hna thawk ten tual mite tan an luanchhuahna CSR kaltlangin thil tangkai tak tak tih a lo nih tawh thin thu sawiin, vengchhung mamawh tak sawichhuah nachang Ramhlun South YMA ten an hria chu an remhria in an vannei hle a ni, a ti a. Morgue Van chuan vengchhung mipui te tan chauh nilo vengdangah pawh mamawh an awm chuan hawh theih tura ruahmanna siam a ni chu lawmawm a tih thu Pu Lal Thanzara chuan a sawi bawk.

Morgue Van inhlanna hunah hian Branch YMA hruaitute leh member bakah ABCI Infrastructures Pvt. Ltd. Executive Director Pu Rajeev Baid leh a thawhpuite an tel a. Morgue Van atan hian Bolero Pik-Up lei niin, a leina leh cheibawlna atan cheng nuai riat chuang sen a ni.