Vawiin khan National Voters' Day (NVD) vawi 9-na chu Lawngtlai DC Conference Hall-ah District Election Officer, Lawngtlai Bawrhsap ni bawk Pu N. Chakhai MCS hovin hman a ni.

Bawrhsap chuan India ram chu mipui rorelna (democracy) ram niin, khua leh tui kum 18 tling chin tawh phawt chuan vote hmangin zalen takin kan duh zawng kan lantir thei a, kan vannei hle a ni, a ti a. Vote thlak hi kan chanvo leh mawhphurhna a ni tiin, mipuite’n zalen taka duh zawng kan thlan hi sawrkar ṭha siamna atan a pawimawh a, huaisen takin vote kan thlak ṭhin tur a ni, a ti. Bawrhsap hian vote thlak pawimawhzia a sawi bakah hian vote nei thei tura inziah luh dan leh election kalphung te a sawi bawk.

He hun hi Sub-Deputy Commissioner Pu Vabeimozachhi Chozah MCS chuan a kaihruai a. Report ngaihthlak niin, NVD thu tiam sawi rual a ni a. Chief Electoral Officer thuchah chhiar chhuah a nih bakah, ERO Pu R. Lalremsanga MCS, DRDA Project Director leh political party hrang hrang ai awhte hnen aṭangin thu sawi ngaihthlak a ni a, zaithiam zai ngaihthlak a ni bawk.

Vawiina Lawngtlaia NVD hmannaah hian official leh District Election staff-te, political party hrang hrang ai awh te, tlawmngai pawl ai awh leh Govt Region Higher Secondary School-a Class-XII zirlaite an kal khawm a. He hun hmanah hian Mizoram MLA Inthlanpui 2018 neih zawh taka Mizoram puma Presiding Officer (PRO) ṭha ber atan Lawngtlai District-a mi KVK Programme Assistant Pu Jonathan Lalrinliana thlan a nih thu sawi lan niin, lawmpui nan kal khawmte'n kut an beng rual a ni.

Special Summary Revision 2019-a a lan dan chuan tun dinhmunah Lawngtlai District chhungah voter 80225 (mipa 39991 leh hmeichhia 40234) an awm mek a. 36-Tuichawng (ST) A/C-ah voter 30585 (mipa 15498; hmeichhia 15087), 37-Lawngtlai West (ST) A/C-ah voter 26126 (mipa 13128; hmeichhia 12998) leh 38-Lawngtlai East (ST) A/C-ah voter 23514 (mipa 11365; hmeichhia 12149) an awm a. Vote nei zawng zawng hian Electors Photo Identity Card (EPIC) an nei vek bawk.

Attachment

  • Loading attachment...