Vawiin hi India ram Prime Minister hmasa ber Pu Jawahar Lal Nehru piancham puala kum tina hman thin 'Naupangte Ni' (Children's Day) a ni a, Lawngtlaiah chuan World Vision India (Chhimtuipui Area Development Programme), District Child Protection Unit (DCPU) leh District Legal Services Authority (DLSA) te tang ho huaihawtin Central YLA Hall-ah hman a ni.

He huna Khuallian, Social Welfare Department hnuaia Lawngtlai District Programme Officer Pi Vanlalhruaii chuan naupangte chu ram hma hun kengtute an nih avangin tuna kan enkawl dan hi a pawimawh em em a, nu leh pate'n thil dang zawng aiin kan fate hi kan ngai pawimawh tur a ni, a ti a. Naupangte'n an naupan lai hun hlim taka an hman a pawimawh thu sawiin, zirlai naupang kal khawmte chu nu leh pate thu awih a, aia upate zah thiam tur leh an zirlai tibahlah thei thil danga inham buai lo turin a chah.

He hun hi Govt Region HSS-a Lecturer C. Laltanpuii'n a kaihruai a. District Child Protection Officer Pi Mary Lalremruati'n inlawmna thu sawiin, DCPU-a Counsellor N. Darchhingpuii'n Naupangte Ni chungchang a sawi a, DLSA-a Legal Aid Counsel Pu C. Lalrinfela'n naupangte dikna chanvo (child rights) a sawi ve bawk.

Vawiina Naupangte Ni hmannaah hian Lawngtlaia sikul hrang hranga zirlaite an kal khawm a, department hrang hrang officer eng emaw zat an tel bawk. Sparkle Kids Pre-School naupangte'n special item an entir a. Children's Club, Ngurnunsangi English School leh Downtown English School zirlaite'n lam an entir a. Ruthi Lalremruati (Class-VI, Govt Bethel MS), Heidi VL Lianchhungi (Class-VI, Govt Bazar MS), Lalremruati (Class-IX, Downtown English School) leh Don Bosco School Children's Choir te hnen atangin zai ngaihthlak a ni a. Naupangte Ni puala thu ziah, lem ziah leh thla lak intihsiakna lawmmante sem a nih hnuin Protection Officer (Institutional Care) Pi PC Malsawmtluangi'n lawm thu a sawi a, hun khar a ni.

Naupangte Ni puala intihsiaknaah hian essay inziahsiakah H. Hmangaihzuali (Cl-X, Don Bosco School) chu pakhatna niin, pahnihna Jenifer V. Lalbiakdiki (Cl-X, Downtown English School) leh pathumna Ezra Lalhuzama (Cl-IX, ML Junior English School) te an ni a. Milem inziahsiakah ST Lailianthangpuii (Downtown English School) chu pakhatna niin, pahnihna Henry Lalnunpuia (Cl-X, Govt Region High School) leh pathumna Sumita Vanhlamawii (Cl-IX, Govt Region High School) te an ni a. Thla inlaksiakah Kiddy Vanchhawng chu pakhatna niin, pahnihna V. Lalengvara leh pathumna K. Lalbiakzama te an ni. He'ng intihsiaknaahte hian thupuiah 'pan lai nun hlimawm (happy childhood)' tih hman a ni.