Vawiin khan District Child Protection Unit, Women & Child Development, Social Welfare Department, Kolasib district buatsaih ‘Children’s Day Programme, 2019’ lawmna hun Diakkawn YMA Hall, Kolasib ah hman a ni a, Pu K Lalrinliana, Minister of State for Food, Civil Supplies & Consumer Affairs department chu khuallian a ni.

Khuallian Pu K Lalrinliana chuan November ni 14 chu naupang ngaina em em tu India Prime Minister hmasa ber Pandit Jawaharlal Nehru piancham denchhena hman a nih thu sawiin naupangte chu kan hma hun hriltutur pawimawh berte an nih thu a sawi a. Isua pawh khan khawvela a cham chhunga naupangte a ngaih pawimawhzia ngaituahin tuna naupang chanhai te, kum tlinglo harsatna hrang hrang avanga buaina tawk mek te venhim leh an dikna chanvo vawn sak hna chu a ropuiin a thawktute chu fakawm a tih thu a sawi. Minister chuan naupang kum tlinglo ten nunkawng an dai sual tur ven chu hna pawimawh tak a nih rualin, rual u zawk, nu leh pa leh khawtlang hruaitute pawh hian naupang te nun khalh ngil kawnga kan mawhphurna te inzirtir thar a tul thu a sawi a, kawng engkimah naupangte chu thlahthlam lo tur leh an thil tihna hrang hrangah ngaihtuahna senpui a telpui peih a pawimawh thu a sawi bawk a ni. Pu K Lalrinliana chuan khawvel sualna pung zelah naupang leh hmeichhe awmnem zawk te chung a hleilenna leh chanvo rahbeh sakna thawm hriattur a tam thu sawiin Mizoram chhung ngeiah pawh hetiang ang chanchin hriattur a awm thin chu pawi a tih thu a sawi a, naupang te seilenna tur hmun ralmuang siam kawngah tupawhin mawhphurna kan nei a ni tih hria a tan la theuh turin kal khawmte a chah bawk a ni.

Vawiin Children’s Day lawmna hun hi Pi Baby Vanlalruati’n a kaihruaia, Pi Laltlanmawii, i/c DCPO, Kolasib in kalkhawmte lawmna thu sawiin Pi C Lalzawmdiki, Protection Officer in DCPU, Kolasib hnathawh leh hmalakna tlangpui tarlanna hun a hmang bawk a ni. He hunah hian Children’s Day puala Futsal leh Essay Writing Competition buatsaih lawman hrang hrang te khuallian hian semna hun a hmang a Enna In (Boy’s Home), Omega Centre leh Audrene Scism Children Home naupang te bakah zaithiam ten hun an hmang bawk a ni. Children’s Day lawmnaah hian Kolasib district chhung a Sawrkar department hrang hrang thawktute leh school naupang thahnem tak an tel a ni.

Kolasib district ah hian Child Welfare Committee hmalakna in kum 2013 atanga 2019 March thla thleng khan thubuai 973 ngaihtuah a ni a, April, 2019 atanga vawiin thleng hian thubuai 89 ngaituah a ni bawk a ni. Kolasib district Juvenile Justice Board hnuaiah 2013 atangin March 2019 thleng khan thubuai 243 ngaituah a ni a, April 2019 atanga vawiin thlengin thubuai 23 ngaihtuah a ni bawk a ni. DCPU, Kolasib hnuaiah hian Family based Non-institutional sponsorship hmathatna naupang 41 te hnenah thlatin Cheng 2000 pek a ni a Enna In (Boy’s Home), Omega Centre leh Audrene Scism Children Home te enkawlin naupang 79 an awm mek a ni.