1286/2024-2025

Dated Lawngtlai, 24th July, 2024: Vawiin khan Lawngtlai District Legal Service Authority leh District Administration Office, Lawngtlai bultumin  tun hnai maia  hman tan dan thar pathum- The Bharatiya Nyaya Sanhita, 2023 (BNS), The Bharatiya Nagarik Suraksha Sanhita,2023 (BNSS) leh The Bharatiya Sakshya Adhiniyam, 2023 (BSA) chungchang zirhona Deputy Commissioner Conference Hall, Lawngtlaiah neih a ni a. Pu Cheemala Siva Gopal Reddy (IAS), Lawngtlai District Bawrhsap chuan hun a hmanpui.

Pu Cheemala Siva Gopal Reddy (IAS) chuan Indian Penal Code (IPC), Criminal Procedure Code (CrPC) leh Indian Evidence Act - te chu British hun laia siam a nih angin duhthu a sam lo hle a Sawrkarlaipuiin dan thar pathum hman tura a chhawpchhuak hi thil lawmawm tak a ni, a ti. Heng dan tharte hi India ziarang mil leh huapzau zawk a siam a ni a, dan tha tak a nih angin India khua leh tui ten an chhawr tangkai dawn hle a ti. Dan thar a nih angin zirchian ngai tak a ni a, Dan kengkawhtu -Police leh Judiaciary te chauh ni lo in sawrkawr hnathawk zawng zawng bakah mipuite pawhin kan hriat chian a tul hle tiin; a bik takin Head of Department- te chu an department hnuaia thawkte hnena he dan thar zir chiang tura thurawn pe  turin a chah bawk.

Bawrhsap chuan IPC, CrPC leh Evidence Act chu British hun laia siam a nih angin, inhremna lam  a kawk deuh ber a, dan tharah erawh chuan tunlai khawvel mila thil tamtak her rem niin, mipui nawlpui tana hriatthiam theih tura siam a ni, a ti. Dan thara thil tam tak belh zingah 'Zero FIR' chu chhawr ber pakhat a nih a rin thu a sawi a. Zero FIR  hmangin khawi  Police Station ah pawh FIR thehluh theih a ni a, FIR chu crime thlenna Poilce Station ah thawn tur niin hei hian 'victim' te tan thil a tiawlsam dawn hle a ni,a  ti. Pu Cheemala Siva Gopal Reddy (IAS) chuan 'Search & Seizure' ah video leh picture fel fai tak a ngai tawh dawn a, hei hian dik leh tha takin Police te hna a thawh tir bakah mipuite pawhin rinna sang zawk an nghat ngam ang a, dik lo taka 'search & seizure' kalpui tur pawh a veng dawn a ni, a ti. Tun lai khawvela hluar tak cyber crime, online fraud leh internet kaltanga inbumna tam tak pawh he dan tharah hian a hrem dan tur felfai tak awmin dan ang thlapa hrem an ni tawh ang a ti.

Pu Cheemala Siva Gopal Reddy (IAS) chuan The Bharatiya Nyaya Sanhita, 2023 ( BNS), The Bharatiya Nagarik Suraksha Sanhita,2023 ( BNSS) leh The Bharatiya Sakshya Adhiniyam,2023 ( BSA) te chu tun hnai maia hman tan a ni a, section tam tak belh leh paih te a awm avangin, he dan thar hrechiang lo tam tak an awm a rin thu a tarlang a. Dan hriat loh hi himnna a ni lo a, dan hriatna chuan huaisenna bakah  dikna chanvo kengkawh kawngah nasa takin min puih zawk thin tiin, he dan thar chiang zawka zir turin sawrkar hnathawk zawng zawng  leh Lawngtlai mipuite a sawm nghal a ni.

Pu Tlualaisa Hlychho, Addl. SP, Lawngtlai pawhin thutawi sawina neiin The Bharatiya Nyaya Sanhita, 2023 (BNS), The Bharatiya Nagarik Suraksha Sanhita,2023 (BNSS) leh The Bharatiya Sakshya Adhiniyam,2023 (BSA) te chu inzawm tlat, Indian Judicial System phuarkhawmtu a ni a ti a. He dan tharah hian thil tam tak belh niin hrechiang tur chuan mahni theuh kan pawimawh tiin dan bu uar zawka en thin  turin a sawm a. Dan thar pathum hman anih hnuin,  Lawngtlai district ah 'Zero FIR' case pakhat a awm tawh thu a tarlang a. The Bharatiya Nagarik Suraksha Sanhita,2023 (BNSS) hnuaia in hremnna pakhat 'Social Community Service'  chu khawtlang tana tangkai tak a nih a beisei thu a sawi bawk.

Vawiin Training ah hian Pu C. Lalremsanga, Judicial Magistrate 1st Class chu Resource Person niin, The Bharatiya Nagarik Suraksha Sanhita,2023 (BNSS)  leh The Bharatiya Nyaya Sanhita, 2023 (BNS), chungchangah  zirtirna a pe a, zawhna leh chhanna hun hman nghal a ni a.

Pu C. Lalrinfela, Advocate chuan vawiin training programme hi a kaihruaiin, Lawngtlai District chhunga Department hotute an telkim tha hle a ni.