1287/2024-2025

24th July, 2024 : Vawiin khan Aizawl Smart City Ltd hmalakna zinga project pakhat Common Bio Medical Waste Treatment Plant,Turial chu UD&PA Minister Pu K. Sapdanga'n a hawng a, khawl hmanga damdawiin bawlhhlawh sawngbawl a nih dan tur enchhinna (demonstration) neih nghal a ni. He project hi Aizawl Municipal Corporation Solid Waste Management Centre, Tuirial area chhunga sak niin Mizoram Pollution Control Board te nena hmalakna a ni.

Common Bio Medical Waste Treatment Plant hi damdawiin mai bakah clinic leh healthcare facility zawng zawngte medical waste sawngbawlna hmun a ni a, Bio Medical Waste Management Rules 2016-in a phut anga din a ni. Mizoramah hetiang Treatment Plant neih hmasak ber tur a ni a, mipui vantlang hriselna lamah he project hi ram hmasawnna rahbi pawimawh tak a ni. He Treatment Plant hian district panga - Aizawl, Kolasib, Mamit, Serchhip leh Saitual district-te a huam a, heng district-a damdawiin, clinic leh healthcare facility awm zawng zawng medical waste hi a khawn khawmtu bawlhhlawh motor bik awmin Turial-a Treatment Plant-ah hian paihin khawl hian bawlhhlawh chu a lo sawngbawl dawn a ni. Health & Family Welfare Dept in ni 22.7.2024- a thuchhuah a siam angin ‘trial run’ AMC area bikah thla hnih chhung atan ASCL-in a kalpui dawn a, hemi rual hian Saitual district bikah H&FW Department-in enchhinna thla hnih chhung a kalpui dawn bawk a ni.

Damdawiin bawlhhlawh sawngbawlna hian khawl chi li (4) a nei a. Bawlhhlawh hlauhawm leh hri kai hal raltu khawl, bawlhhlawh ti (sterilize) thianghlimtu khawl, bawlhhlawh ?hial sawmtu khawl leh tui leh damdawi thli lo tithianghlimtu khawl te a ni. Bawlhhlawh phurtu motor-te hi silfai nghal zel tur an nih avangin Treatment Plant-ah hian silfaina hmun a awm nghal a, bawlhhlawh dahkhawmna hmun bik pawh felfai taka siam niin power khaihlak changa khawl chawm thei tur generator 250KVA a hmunah hian dah a ni bawk.

Vawiin Plant hawnnaah hian Secretary, UD&PA, AMC Mayor, Secretary, H&FW Dept, Municipal Commissioner, AMC, Director, UD&PA, Member Secretary, Mizoram Pollution Control Board leh official dangte an tel a ni. Common Bio Medical Waste Treatment Plant project cost hi cheng 9.71 Crore niin he  project atan hian 2 Crore hi Ministry of Environment, Forest and Climate Change, Govt. of India in a tum bawk a ni.