1288/2024-2025

Aizawl dated 24th July 2024: Nimin khan Minister Prof. Lalnilawma chuan Union Minister Shri Shivraj Singh Chouhan , Ministry of Agriculture & Farmer's Welfare leh Ministry of Rural Development leh Union Minister Shri CR Patil, Ministry of Jal Shakti te chu kawmna hun a nei.

Minister Prof.Lalnilawma'n Union Minister pahnih a kawmna ah hian Union Minister of State leh official dangte an tel a. Union Agriculture & Farmer's welfare leh Rural Development Ministry changtu Shri Shivraj Singh Chouhan hnen ah hian a hnuai a tarlan te hi a sawipui a ni.

1) Mizoram thlai tharte hralhna ṭha zawk a awm theihna tur a hma lakpui turin Union Minister hnen ah hian ngenna thlen a ni a, puih an inhuam thu an lo sawi a. Man man zawk a thlai thar hralh a nih theih nana sawngbawlna kawng ah Entrepreneur-te tan ṭanpuina a awm theih thu an sawi.

2) Mizoram tan Centre of Excellence for Mushroom ruahmanna tur thlen a ni a. Chu chuan Shitake Mushroom leh a dangte thar chhuah leh ram pawn a thawnchhuahna kawng ah nasa takin a puih tur thu sawi a ni. Union Minister chuan he an thil thlen tih hlawhtlin nan hian tanpui a inhuam thu a sawi.

3) Farm Connectivity – Tun a Mizoram State-in a mamawh ber pakhat, huan/zau inkalpawhna kawng siam a nih theih nan ṭanpuina an mamawh thu Prof. Lalnilawma chuan sawiin Union Minister chuan ‘Farm Connectivity’ bik atan kum thar ah scheme siam a nih theih nan ruahmanna duan a tul tur thu a sawi.

4) Saitual District tan a Krishi Vigyan Kendra din sak tur a Saitual DC-in dilna a thehluh bawhzui a ni a. Ram pum ah KVK thar 121 din tur a ruahmanna buatsaih mek ah Mizoram a District thar pathum te telh sak an ni a. He ruahmanna hi Expenditure Finance Committee (EFC) pawmpui tur a theh luh a ni ang a, hun rei lote ah a dinhmun hriat beisei a nih thu sawi a ni.

5) Rural Development hnuai a- MGNREGA - Cluster Facilitation Project (CFP) hnuai a hnathawkte hlawh tur Cheng 2.47 Cr. dawn a la nih loh thu thlen niin rang tak a pek chhuah a nih theih nan a tul ang a bawhzui nghal a nih tur thu sawi a ni.

Ministry of Jal Shakti changtu Union Minister Shri CR Patil nen a inkawmna hun ah hian Prof. Lalnilawma chuan Cyclone Remal-in Mizoram a tui pump khawl a tihchhiat thu te leh harsatna hrang hrang thleng te chu Ministry-ah thehlut a nih tawh thu hrilhhriat a ni a. Mizoram a ruahtui khawlna kalpui dan tur leh tlang kar remchang lai a tui khuah siam a pawimawh thu a thlen a. Heng rawtna tihlawhtling tur hian zirchianna kalpui hnu ah a tul anga bawhzui a nih tur thu Union Miniter chuan a sawi.

Small Farmers’ Agri-Business Consortium (SFAC) Chairman-cum-Managing Director office pawh Prof.Lalnilawma hian tlawhin Honey Project thehluh a nih tawh thu a sawi a. July ni 25, 2024 a Indian Chamber of Commerce-in Guwahati-a ‘North-East Water Conclave’ an buatsaih tur ah Minister Prof. Lalnilawma hi khual zahawm ni tur a sawm a nih angin a tel ang a. Minister of State, DoNER chu khuallian niin North East State-a Public Health Engineering Department Minister zawng zawng tel tur a beisei an ni.