Vawiin (July ni 21) chawhma dar 11 khan DC Conference Hall-ah Lawngtlai District Deputy Commissioner Dr A.Muthamma hovin office hrang hrang tana ni tha (solar energy) hman tangkai theih dan tur ruahmanna (Grid Connected Solar Rooftop System) chungchang sawi ho a ni a. P&E Department lam ai awhte’n a awmzia leh engtia kalpui tur nge a nih sawi fiahin, hma lak dan tur hrang hrang rel a ni.

Ram pumah duh khawp power supply a awm loh avangin sawrkar laipui atangin sawrkar office leh sikul hrang hrangah ni tha hmang tangkai tura ruahmanna kalpui a ni a. He ruahmanna hi Grid Connected Solar Rooftop System (GCSRS) tih niin, hei hian nasa takin power supply indaih lohna phuhru tura beisei a ni. Lawngtlai District atan hian P&E lamin sawrkarah rawtna theh lut tawhin, sawrkar laipui lamin engtin nge an kalpui zel dawn hriat chian a la ni chiah lo va. Lawngtlai District chhung bika hma lak dan tur chu committee-in a tul ang zelin a ngaihtuah chho zel dawn a ni.

GCSRS-ah chuan in chungah solar panel dah a ni ang a; chu chuan ni eng hnuaiah power siam chhuakin, mamawh hrang hranga hman nghal theih tur a nih bakah, hman sen loh awm chu ni eng awm loh hun pawha eng emaw chen la daih thei turin grid-ah khawl khawm a ni bawk ang.

Vawiin meeting-ah hian Lawngtlaia sawrkar office hrang hrang hotu lute an kal tha hle.