Vawiin khan Social Welfare Minister Pu PC Lalthanliana hovin Aijal Club Conference Hall-ah Departmental Review Meeting neih a ni a. Social Welfare Secretary Pu P.Lalchhuanga kaihhruai he review meeting-ah hian Social Welfare Parliamentary Secretary Pu K.Lalrinthanga pawh tel vein department hmalakna leh hmachhawp hrang hrang sawiho a ni.

Minister Pu PC Lalthanliana chuan department officer leh hnathawkte inhmukhawm a, hmalaknate inhriatpui leh sawiho hi a hlawk a, department khata thawkho hi induhsakna chang an hriat chuan thawhhona a nuamin a chak thin a ni, a ti a. Social Welfare Department hnuaia central sorkar scheme hrang hrang kalpui mek zingah thenkhat chu sorkar department dangte nena convergence-in kalpui a nih avangin department dangte tan pawhin Social Welfare Department hi malsawmna thlentu a ni, a ti. Tunhnaiah Ministry of Tribal Affairs-in BPL tribal chhungkuaa hmeichhe puitling gas connection la nei lote tan a thlawna pek a tum chungchang sawiin Minister chuan rampumah he scheme kalpuina tur district 181 an thlan zingah Mizorama district 8 an rawn thlang vek hi a vanneihthlak takzet a, BPL hmeichhe gas connection la neilote thlanchhuahnaah pawh Department chuan khawtlang hruaitute nen thawkhovin fimkhur takin a kalpui dawn, a ti a. Old Age Home leh Observation Home sakna tur cheng vaibelchhe 4 ve ve dah tawh a nih thu te; District zawng zawngah ICDS hnuaiah Observation Home hawn vek a ni tur leh a thawktu tur pawh lak fel tawh a nih thu te; hmeichhia tharum thawhna avanga harsatna tawkte puitu tur 24x7 Women Helpline leh One Stop Crisis Centre te ruahman chho zel a nih thu leh hmeichhe tharum thawhna tuartute tan damdawi in a bik takin siam tur a nih thute a tarlang a. Social Welfare Department chu naupang, hmeichhia leh tar te hamthatna tura thawk department a ni a, chhungkua leh khawtlangah pawha a chhe lai leh khawlo lai anga an ngaihte enkawltu department an nih angin inpekna tak tak nen midangte tana malsawmna ni turin theihtawp zel chhuah turin Department officers leh staff te a fuih.

Parliamentary Secretary Pu K.Larinthanga pawhin thu sawiin Social Welfare Department chuan midangte hriat lohvin thawh an ngah a, naupai atanga tar thleng an enkawlna kawngah an inpekna leh hnathawh dan chu a fakawm hle a ni, a ti.

Vawiin review meeting-ah hian State Programme Officer, ICDS Pi V.L.Pianpuii chuan Mizoram pumah ICDS dinhmun, hmalakna leh mamawhnate sawizauna hun a hmang a. Integrated Child Development Scheme (ICDS) hnuaiah a vaiin Anganwadi Centre 2244 awm mek a, naupang enkawl mek zat chu 1,43,680 a ni. ICDS District Cell hi Aizawl leh Lunglei ah din tawh niin district dang 4 - Mamit, Champhai, Kolasib leh Lawngtlai-ah din turin hmalak mek a ni bawk a. Ni 15th January 2015-a Prime Minister-in a tangzarh tak, hmeichhe naupangte hamthatna keng bik scheme ‘Beti Bachao, Beti Padhao’ chu Saiha District-ah kalpui mek a nih thu a tarlang a; he scheme hi child sex ratio national average 1000:918 aia hniamah chauh hman tur tih a ni nghe nghe. Swachh Bharat Mission hnuaiah hian ‘Bal Swachh Mission’ kalpui a ni bawk a, he Mission hi ni 14th November 2014 khan Minister Pu PC Lalthanliana’n a hawn rual khan Anganwadi Centre zawng zawngah zawm nghal a ni. Sorkar Laipuiin a ngiat angin Anganwadi Worker zawng zawngte chu life insurance tihsak vek a ni bawk.

Social Welfare Department hnuaiah hian office/hmalakna hrang hrang 138 a awm a, heng zingah hian State Child Protection Office, Juvenile Justice Board, State Adoption Agency, Mizoram State Women Commission te bakah Universal Women Helpline, State Women Rescue Centre, Poorna Shakti Kendra (Khawzawl), District Coordination Centre (Champhai) leh District tina One Stop Crisis Centre te pawh an tel.

Review Meeting hi Jt. Secy. Social Welfare Pi K.Vanlalrawni kaihhruaina hnuaiah chawhnu lamah neih chhunzawm a ni a, heng a hnuaia mite hian presentation hun hmangin sawihona neih zui nghal a ni :

1. Person with Disabilities : Pu B.Kapliana, Asst. Commissioner

2. National Social Assistance Programme (NSAP) : Pi Zonunpari SO(N)

3. MSD&RB : Pi Lalparmawii, CEO

4. ICPS with Adoption : Pi Amy Lalrinpuii, Prog. Manager, SCPS

5. Special Home : Pi Ruth Vanlalsawmi, Asst. Director

6. National Mission for Empowerment of Women : Pi Chuauziki, Asst. Director

7. Protective Home : Pu R.Lalnunmawii, Superintendent

8. R.I.T.C. : Pi C. Zodinpuii, Superintendent

9. Mizoram State Social Welfare Board : Pi Remliani Chawngthu, District Prog. Officer

10. State Commission for Women : Pi Lalbiakkimi, Member Secretary