Lawngtlai District-a NLUP hlawhtlinna pho chhuahna NLUP Kutpui 2018 (Fair-cum-Exhibition) chu vawiin khan Lawngtlai Bazar Venga Dokulha Hall-ah AH&Vety Minister Pu C. Ngunlianchunga'n a hawng.
Pu C. Ngunlianchunga chuan NLUP chu mi rethei leh hnuaihnung zawkte'n ei leh bara intodelh a, kawng tinrenga changkanna kawng an zawh theih nana ruahman a nih thu sawiin, NLUP thil tum chu Mizoram atanga retheih pachhiatna um bo va, mi retheite tana eizawnna ngelnghet siamsak a ni, a ti a. Tam takin an hlawhtlinpui laiin hlawhtlinpui ve lem lo pawn an awm tho tih sawiin, a dawngtuteah a hlawhtlin leh hlawhtlin loh chu a innghat a ni, a ti. NLUP tanpuina chu a buaipuitute'n khawih chingpen awmin lovin, a dawng tura thlan chhuahte hnenah zaa za a thleng tih a sawi a. Mahni trade thlan hlawhtlinpui kher lote paw'n in leh lo leh bungruaa hma sawn phah nan an hmang chu NLUP hlawhtlinzia tilangtu a ni, a ti.
Lawngtlaia NLUP Kutpui hawnna hun hi Lawngtlai District NLUP Nodal Officer, SDO (Sadar) Pi Rochuangkimi Khenglawt MCS chuan kaihruaiin, kal khawmte lawmna thu a sawi a. Sub-Deputy Commissioner Pu Vabeimozachhi Chozah MCS chuan NLUP hnuaia hma lakna hrang hrang leh a hlawhtlinna tlangpui a sawi a. Zaithiamte zai ngaihthlak a ni bawk.
Khuallian Pu C. Ngunlianchunga hi a nupui, Pi KR Chhingpuii leh LADC-a member eng emaw zat leh party lam hruaitute'n an tawiawm a. Hawnna inkhawm hman zawh hian Khuallian chuan stall hrang hrang a tlawh kual nghal a ni.
Vawiina NLUP Kutpui hawnnaah hian sawrkar official-te leh kut hna thawktute leh mipui eng emaw zat an kal khawm a. Hawnna hun hman zawhah stall hrang hrang chu mipuite tlawh theih tura hawn nghal niin, he NLUP Kutpui hi mipuite'n an hlut hle a. Stall hi a lun hlawmin, thil pawh an hralh tha hlawm viau a. Bungraw thenkhat phei chu mipuiin an inchan loh khawp hialin a zo rang a ni.
Lawngtlai District NLUP Kutpuiah hian line department pariat te'n stall hawng thei vekin, a vaiin stall 16 buatsaih a ni a. Thil pho chhuah reng reng hi a man pangngai aia 20% zela tlawma zawrh chhuah a ni.

Attachment

  • Loading attachment...