2814/2022-2023

Sahmulphah thla ni 26, 2022: November ni 22, 2022 (Thawhlehni) zan aṭanga khelh, Officers' Club Lawngtlai (OCL) huaihawt Lawngtlaia state/central/PSU/bank hnuaia department hrang hrangte intihhlimna, Inter-Departmental Sports 2022 chu nimin tlai lam khan khelh zawh niin, Rorela Futsal Ground, Lawngtlai Vengpuiah Lawngtlai Bawrhsap Pu Amol Srivastava, IAS hovin a kharna hun hman a ni.

Bawrhsap chuan harsatna awm lova hlawhtling taka inter-departmental sports khelh zawh a ni ta chu lawmawm a tih thu sawiin, department hrang hrangte kara inpawhna ṭha leh thawh hona ṭha siamtu a nih a, hun lo kal turah Lawngtlai District-in a rah chhuah duhawm tak a tel ngei a beisei thu a sawi.

He Inter-departmental Sports kharna hi Organising Committee Chairman, OCL Sr Vice President Pu C. Lalruatkima, Additional SP chuan a kaihruai a. Organising Committee Vice Chairman Dr Charlie C. Chawngthu, Veterinary Officer leh OCL Secretary i/c Information & Publicity Pi Malsawmtluangi Bawitlung te huaihawtin lawmman dawngtute hnena medal leh trophy hlanna hun hman nghal a ni.

OCL huaihawt Inter-departmental Sports 2022 hi November ni 22 - 25, 2022 chhung neih niin, infiamna chi hrang panga - futsal, badminton, table tennis, carrom board leh chinese checkers hmangin inelna buatsaih a ni a. Department/office 50 chuang chu team 15-a inṭhenin Sports hi kalpui a ni a. A pumpuia category 13 awmah gold 3 leh bronze 2 lain Team 4 (CMO, DMS & ANM School) chu champion an ni a; gold 2, silver 1 leh bronze 1 latu Team 2 (Police, Excise & DCPO) chu pahnihna niin, gold 2 latu Team 9 (DTO, P&E & BSNL) chu pathumna an ni.