DIRECTORATE OF INFORMATION & PUBLIC RELATIONS, Government of Mizoram, India

2815/2022-2023

Siaha; the 26th November,2022: Tukin zing dar 8:00Am khan District Playground, Siaha Vaihpi-ah Siaha District All Mizoram Farmers' Union(AMFU) te huaihawtin Crops Exhibition cum Silver Jubilee lawmna hun hman a ni a. Dr.K.Beichhua, Minister for AH&Vety,SwD etc, Pu H.Malvin,CEM leh Pu Lalsangliana,DC te chuan khuallian leh Khualzahawm te niin hun an hmanpui. Minister hian Siaha District AMFU Silver Jubilee Souvenir a tlangzarh nghal.

Minister chuan Crops Exhibition hawnna thuchah sawiin, Ram ropui leh Changkang kan tih te ho hi Agriculture &Allied sector a ngelnghet tak, ram dangah pawh thawnchhuak theih khawpa intodelh te an ni thin. Kan vanneia ranvulh nan leh thlai leh thei chi hrang hrang chin nan Mizoram leilung leh sik leh sa te hi a tha tawk em em a ni.

Kan Loneitute leh ranvulhtu ten an rawn theih turin tunah chuan Line Department hrang hrangah mithiam kan nei thluah tawh a. Ei leh bar intodelh tur chuan Taimakna chiah kan mamawh a ni. kan Siaha District thalai te pawhin District pawn leh ram pawna Thalai ten, mahni kut-ke a ding theih tura an thawhrim zia te hi entawn se, Nu leh Pa te chawmhlawm ni mai lova, mahni intodelh tak leh chhungkaw chawm theihtu nih zawk tum theuh turin Siaha District Thalai te ka fuih mawlh mawlh a ni, a ti.

Tukin Crops Exhibition -ah hian Farmer te bakah Agriculture, Sericulture, Horticulture, Fishery,AH& Vety etc Dept ten Stall siamin an Department theuh tharchhuah thil te chu mipui lei theih turin an phochhuak a ni.

Ranvulh leh Sangha chi hrang hrang, Thlaihnah leh Thlairah chi hrang hrang, Thei leh Pangpar chi hrang hrang, Buh leh Bal etc..ah te hian Category hrang hrang siamin, Category tinah 1st-3rd prize bakah Consolation Prize te siam niin, tangkafaia lawmman hi pek an ni. Heng bakah hian Exhibition pumpui a Queen of the Exhibition leh King of the Exhibition chu Minister hian a thlangchhuak a.Queen of the Exhibition atan Fishery Dept hnuaia lawmman Pakhatna dawngtu Sangha(Grass Carp) chu thlan a ni a. King of the Exhibition atan Thlairah category hnuaia pakhatna lawmman dawngtu Mai(Pumpkin) chu thlan chhuah a ni bawk.

Tukin Crops Exhibition cum Silver Jubilee lawmna programme hi Prof.Chawngkhuma Chawngthu,President AMFU in kaihruain, Pu LT.Muana,Vice President AMFU in hunserh a hmang a, Pu K.Malsawma, Secretary, AMFU in AMFU hmalakna hrang hrang leh hmachhawp te report a pe bawk.

Khuallian Pu H.Malvina, lCEM,MADC leh Pu Lalsangliana,DC te pawhin thu sawina hun tawi an hmang.

Minister hian Crops Exhibition cum Silver Jubilee lawmna pual hian Siaha District AMFU te hnenah Rs.1,00,000/- tanpuina a pe a.CEM leh DC te bakah Line Department Head of Office te pawhin AMFU te hnenah hian Exhibition leh Silver Jubilee lawmna pual hian tangkafaiin tanpui an hlan hlawm bawk a ni

Pu F.Chhawnmanga,Sr.Vice President (AMFU) in lawmthu sawina in vawiin programme hi a khar ta a ni.

Attachment