2816/2022-2023  

Lunglei the 26^th November' 2022 : Vawiin khan Nehru Yuva Kendra leh Deputy Commissioner Office, Lunglei te buatsaihin Arts & Culture Auditorium, Lunglei ah National Constitution Day (Samvidhan Diwas) hman a ni. Pu Donny Lalruatsanga, Addl. Deputy Commissioner, Lunglei chuan khuallian niin a hmanpui.

National Constitution Day inkhawm hi Pu David Lallawmsanga, District Youth Officer, NYK, Lunglei chuan kaihhruaiin khuallian Pu Donny Lalruatsanga chuan NYK leh DC office, Lunglei ten National Constitution Day puala hun buatsaih a ni chu fakawm a ti a. India Constitution hi khawvel a Constitution thaber leh ropui ber a ngaih a ni a, Constitution Drafting Committee Chairman Dr. B.R. Ambedkar kaihhruaia duan hi 26^th, November, 1949 ah pawm a ni a, 26^th January, 1950 atanga hman tan a ni a ti.  India khua leh tui kan nih angin Constitution hi kan zawm a ngai a, kan intluktlanna, kan culture vawnhim leh sakhaw zalenna te hi Constitution hian min humhalh sak a ni. Sakhaw zalenna ram kan ni hi a vanneihthlak a, ram thenkhatah chuan sakhaw zalenna hi an nei lova keimahni duhtlanna a sakhaw zawm hi kan thei a, hei hian sakhaw zalenna ram a awm a ti nuam a ni a ti a. Kawng hrang hranga intluktlanna hna zawnna ah te, zirna ah te, mipa leh hmeichhia eng sakhua pawh nise intluktlanna kan nei a ni a ti bawk. Kan chawr chhuahna atanga kan culture a bet tawng, thawmhnaw leh a dangte vawnhimna tur atan zalenna kan neih te hi constitution tha leh ropui kan neih vang a ni tiin khua leh tui kan nih angin tih ve tur a awm a, India ram tana rinawm te, mi mangang leh mirethei chawikan te hi kan tih ve tur a ni a ti bawk.

Pi Margaret J. Vanlalremmawii, DTO leh BDO, Lunglei nibawkin Special Summary Revision, 2023 a vote nei thei tura inziah luh leh  vote thlak pawimawh zia  Systematic Voters Education and Electoral Participation (SVEEP) chungchang sawina a nei a ni.

He hunah hian Lunglei Govt. College, Govt. J. Buana College, Govt. Leitlangpui Higher Secondary School leh Baptist Higher Secondary School NSS Volunteer te telin National Constitution Day pualin Elocution hun hman a ni. The Constitution of India Preamble sawi rualna neih a ni bawk.