2155/2023-2024

Lawngtlai dated 4th October 2023: Vawiin chawhma khan DC Conference Hall, Lawngtlaiah October ni 1, 2023 behchhan a Electoral Roll ennawn tlangzarhna hun neih a ni a. Pu Abraham Beirazi Khithie, Deputy District Election Officer chuan E-Roll hi tlangzarhin Pu Denny Lalchhuanawma, Election Officer-in hun a kaihruai a. Returning Officer, Assistant Returning Officer, Booth Level Officer, Political party leh tlawmngai pawl hrang hrang aiawhte he hun ah hian telin kum 18 tling thar, Electoral Roll-a hming ziaklutte hnen ah EPIC hlanna hun hman a ni bawk.

Pu Abraham Beirazi Khithie, Dy. DEO chuan ram hruaitu thlan chhuah kawng a hmanraw pawimawh tak, Electoral Roll ennawn chu hna hautak leh uluk ngai tak a nih thu sawiin inthlanna felfai tak kalpui turin Electoral Roll rintlak neih a pawimawh thu a sawi a. Electoral Roll ennawn hna hlawhtling tak a kalpui a nih theih nana District Election Office hnuai a thawktute bak ah E-Roll rintlak tak kan neih theih nana a tul apiang a kal chhuak thin, Assistant Returning Officer leh Booth Level Officer-te inpekna chu fakawm a tih thu a sawi. Lawngtlai district-in Electoral Roll rintlak a neih theihna tur a khaw hrang hrang a tlawmngai pawl ten a tul apiang a thawktute an lo tanpui thinna ah Pu Abraham Beirazi Khithie chuan lawmthu a sawi a, MLA inthlanpui lo awm tur ah pawh tlawmngai pawl hrang hrang hruaitute chu thawh ho pui ah a sawm bawk a ni. Election kaihhnawih a mawhphurhna neite chu thil hriatchian loh avanga harsatna a awm loh nan tun atangin inthlan chungchanga inkaihhruaina bu te uluk tak a zirchiang turin Dy. DEO chuan a ngen bawk a ni.

Vawiin a Electoral Roll ennawn tlangzarh ah hian Lawngtlai district-ah Voter 91439 awmin Electoral Roll ennawn hma ami nen a inthlauhna hi 1690 a ni a, Voter punna hi za zel ah 1.88 ang a ni. 36-Tuichawng Assembly Constituency-ah voter 36042 an awm a, 37-Lawngtlai West ah voter 29493 awmin 38-Lawngtlai East ah voter 25904 an awm bawk a ni. Voter awm zat atanga 45685 chu mipa an ni a, 45754 chu hmeichhia an ni a. Lawngtlai district-ah hian Service Voter 232 awm anga chhinchhiah a ni bawk.