Vawiin chawhma dar 11 khan Lawngtlai SP Conference Hall-ah Superintendent of Police, Lawngtlai leh District Child Protection Unit (DCPU), Lawngtlai tang kawp buatsaihin naupang vakvaite tanpui beihpui thlak (Operation Muskaan-II) chungchang zir ho a ni.

He zir hona hi Lawngtlai SP Pu F.Lalsanglura chuan hawngin, naupangte humhalhna dan tha tak tak awm chu tangkai taka hmang turin uluk taka inbuatsaih hmasak a tul thu a sawi a. Naupangte chu khawvela ro hlu ber, chhungkua, khawtlang leh ram hma hun hriltu an nih avangin tha taka enkawl an tul hle a; India rama naupang ruk bo hluar em em pawh hi thawh hona tha tak nen do tura inpuahchah a tul a ni, a ti.

He hun hi Lawngtlai Sub-Divisional Police Officer Pu Tlualaisa Hlychho chuan a kaihruai a. Lawngtlai DCPU-a Protection Officer Pi Lalrithangi, Legal-cum-Probation Officer Pu Tommy Hmingdailova leh Lawngtlai District Chief Judicial Magistrate Pu Laldinpuia Tlau te'n naupang humhalhna dan chi hrang hrang – Protection of Child Right Act, POSCO Act, Juvenile Justice Act leh CrPC leh IPC-a dan pawimawh dangte an zirtir a ni.

He training-ah hian Lawngtlaia Police Officer leh an staff te, DCPU staff te bakah, naupangte chanvo humhalh kawnga hma latu hrang hrangte an tel a. Operation Muskaan-II hian a tum ber chu naupang bo leh hlamchhiah, enkawltu nei lote zawn chhuah a, chhanchhuah leh chhawmdawl a ni a. Chuti ang naupangte chu an awmna tur home leh chhungkua te zawnsakin, nun pangngai tak an neih theih nan tanpui an ni thin.