Vawiin chawhma khan Lunglei DC leh District Level Monitoring Committee for Celebration of Teachers’ Day 2016 Chairman ni bawk Pu Abhijit Vijay Chaudhari, IAS kaihhruaiin a pisaah Teachers’ Day 2016 hman dan tur an rel.

District Education Officer leh District Level Working Committee for Celebration of Teacher's Day 2016 Secretary ni bawk Pu Lalramthianghlima chuan kum hmasa lam a hman a nih dan report a pe a.

District Level Committee chuan State Level Committee-in a lo rel tawh angin, a remchan dan anga mahni school theuh a hman nise a ti a. Sawrkar leh private school-a zirtirtute pawisa thawh khawm hmanga zirtirtu damlo leh harsa te tanpui nise a ti a. Mipui atanga tanpuina pe duh an awm pawhin, DEO emaw District Level Committee hnena tanpuina pe thei tura ruahmanna siam nise a ti a. Heng bakah hian zirtirtute chawimawi nan thil man sang leh hautak pek loh hram nise tiin a rel bawk.

Meeting ah hian Lunglei SP, School Education department, Primary, Middle, High School, Higher Secondary School Association aiawh te bakah tlawmngaipawl aiawh te an tel a ni.