Pu Lalrinmawia Ralte, LE & IT Minister chuan vawiin khan MYC leh DoNER tangkawp buatsaih Skill Development and Capacity Building Training Programme hnuaia zirlai hna hmu te lawmpuina leh thlahna hun IAS & SSC Coaching Centre, Dinthar II a neih chu a hmanpui. Inkhawm hi Pu Nghaklianmawia, MCS (Rtd.) Member, Mizoram Youth Commission in a kaihruai a ni.

Pu Lalrinmawia chuan placement chungchangah Mizoram atanga train chhuak te hi kan vannei hle a chuvangin kan hnathawhna turah te rinawmna, chhelna leh taimakna nena thawkin, kan nihna kan identity ah kan nghet tur a ni a, mahse kan hna thawhna a zirin kan awm dan kan thlak thiam a tul thu sawiin kan tih tur dik tak ah kan chian a ngai hle a ni, a ti. Hnathawk thar turte chu Minister chuan an hnathawhte a tirah a hahdam thlak loh hle ang a, mahse heng te hi paltlang a, kaisanna te a awm a ni tih hre renga chhel taka thawk turin a fuih bawk.

Pu T. Sangkunga, Chairman, MYC chuan tunhma chuan India ram khawpuiah chauh training tha hi an lo pe thin emaw kan tih laiin Aizawl ah ngei training na hmun tha tak kan nei hi lawmawm a tih thu a sawi a. Aizawla training chhuak ten hna tha tak tak an hmu a, hei hi zirtirtu te leh consultant tha kan neih vang a ni, tiin Pu Sangkunga chuan Mizoram sorkar in Skill Development a ngaih pawimawh thu a sawi bawk.

Vawiin hian training zo mi 61 hna hmute chu thlah an ni a, Deltin Casio Royale, Goa ah mi 48; JW Marriot, Kolkata ah 9; Radisson Blu, Goa ah 4. A hma in mi 109 hna hmu te 7th July, 2016 khan thlahna hun hman a lo ni tawh a. Saudi Airlines hnuaia On the Job Training, Kolkata a mi 18 training tur a thlanchhuah te pawh thlah an ni.