Vawiin khan Lawngtlai SP Conference Hall-ah Superintendent of Police, Lawngtlai leh District Child Protection Unit (DCPU), Lawngtlai tang kawp buatsaihin naupang vakvaite tanpui beihpui thlak (Operation Muskaan-III) chungchang zir ho a ni.

He hun hi Lawngtlai Sub-Divisional Police Officer (SDPO) Pu Saidingliana Sailo chuan a kaihruai a. Lawngtlai DCPU-a Legal-cum-Probation Officer Pu Tommy Hmingdailova, Social Worker Pu K. Lalliantluanga leh Counsellor Pi Zohlimpuii Hmar te'n naupang humhalhna dan chi hrang hrang – Child Rights, Juvenile Justice Act, POSCO Act leh CrPC leh IPC-a dan pawimawh dangte an zirtir a. Sawi hona leh zawhna leh chhanna hun hman a nih hnuin, DCPU-a Outreach Worker Pu Lalpuiliana’n lawm thu sawiin hun khar a ni.

He training-ah hian Lawngtlaia Police officer leh staff te, DCPU staff te bakah, naupangte chanvo humhalh kawnga hma latu hrang hrangte an tel a. Operation Muskaan hi nikum hmasa atang khan kum tin buatsaih a ni thin a. A tum ber chu naupang bo leh hlamchhiah, enkawltu nei lote zawn chhuah a, chhanchhuah leh chhawmdawl a ni a. Chuti ang naupangte chu an awmna tur home leh chhungkua te zawnsakin, nun pangngai tak an neih theih nan tanpui an ni thin.