Vawiin khan Aizawl District Rural Development Agency (DRDA) buatsaihin Aizawl District huamchhunga Sankalp Se Siddhi Abhiyan Sammelan, India thar (New India) siam tura intiamna leh he movement chungchang inhrilhriatna hun chu Sihphir Community Hall-ah neih a ni a. Govt. Dy. Chief Whip Pu RL Pianmawia chu khuallian niin New India Movement thutiam (pledge) sawihona a kaihruai a ni. 

Pu RL Pianmawia chuan kalkhawmte chu mahni inenfiah a, “hmasawnna turin theihna ka nei” tih rilru pua intiam thar turin a fuih a. Sankalp Se Siddhi Abhiyan Sammelan-in a tum, India ram thar kai tur chuan mipuiten midangte tih tura dah lova, mahni mawhphurhna theuh hlenchhuah a tul a ni, a ti. Retheihna umbo tura sawrkar hmalaknaah mipui tawiawmna leh tih tak takna a pawimawh tih sawiin Central leh State sawrkarin mi retheite dawmkanna tur ruahmanna a siam kaltlanga an thil dawnte a hmanna tur dik taka hmang turin Pu RL Pianmawia chuan kalkhawmte a  fuih a. Corruption hi sawrkar atanga hlawh la te chauh hmehbel lovin kut hnathawktute pawhin sawrkar atanga an thil dawn an hman dikloh te leh sawrkarin mipuite tih ve tura a phut tih duhlohte hi hlemhletna chi khat a ni tih hriaa mahni theuh in enfiah turin a sawm bawk.

Ram zalenna sualtuten Quit India Movement an kalpui atanga kum 75-naah Prime Minister Narendra Modi chuan Sankalp Se Siddhi New India Movement hmalakna thar a puangzar a. He hmalakna hi kum 2017 atanga 2022 chhung neih tur niin India ram chu retheihna, rawlrala chetna, chi leh chi inthliarna, sakhaw intihbingna, eirukna leh hlemhletna bawih ata zalenna hmu turin sawrkar leh ram chhung mipuiten tan an la dawn a. Ram zalenna sualtute hmathlir tipuitlinga, beiseina nena India ram thar an thlir lawk chu a taka tihhlawhtin tumin tan lak a ni dawn a ni.

DRDA, Aizawl Project Director Pu V.Lalengmawia kaihhruai Sankalp Se Siddhi Abhiyan Sammelan ah hian Tlangnuam BDO, IWMP-IX  Project Implementing Agency (PIA) aiawh leh PHE Department aiawh ten Rural Development hnuaia Sihphir leh a chhehvela an hmalakna thenkhat sawizauna hun an hmang a. Kum 2016-17 chhungin MGNREGS kaltlangin Sihphirah ni 36 inhlawhna siam niin 2015-16 chhung khan ek in (toilet) 12 sak zawh a ni. Swachh Bharat Kosh Programme hnuaiah ek in  thalo zual Sihphirah 22, Sihphir Venghlunah 30 leh Sihphir (Neihbawih)-ah 13, a vaiin 65 sak thatna tur sum neih fel tawh a ni thu tarlan a ni bawk.