Lawngtlai District Thingkaha Chawki Rearing Centre-a pangang no khawi dan (chawki rearing) zirna ni sawm (10) awh training chu vawiin khan khar a ni a. DRDA Project Director Pu R. Lalremsanga MCS chuan kharna hun hi a hmanpui. 

Pu R. Lalremsanga chuan pangang khawi chu hmasawn nan leh dinhmun sawh ngheh nana eizawnna tling a nih thu sawiin, enkawl leh deh ral nuam tak a nih avangin theih tawp chhhuaha kalpui tlak a ni, a ti a. Taima tak leh hunbi fel tak neia enkawl ngai a nih avang erawh chuan mi taima, tumruh leh ti tak takte tan lo chuan din chhuahpui theih a ni lo ang, a ti. Pangang khawi atanga thar chhuah silk cocoon chu a hralhna a that viau laiin, thar chhuah a la tlem a, cheng tam tak man pawh ritsak lo te a nih avangin a tihralna kawngah pawh a zangkhaiin sum sen a tlem a, a hlawk em em a ni tiin, training-a kal khawm pangang khawitute chu tih tak zeta kalpui turin a chah a ni. 

He hun hi Lawngtlai District Sericulture Officer Pu R. Lalbiakthanga’n a kaihruai a. Pangang khawitute vanneihzia sawiin, a chaw, a in sak, a no, a hmanrua leh a hralhna thlengin sawrkarin a ngaihtuahsak vek a; pangang chu a keu atanga ni 25 lekah a cocoon thei a; buaipui vak ngai lovin man man takin a tihral theih a; Mizoram sik leh sa nen a inmil em em bawk a ni, a ti a. Ram intodelh nana eizawnna nghet, tlo leh tlak ber tur zinga mi a ni, a ti. 

Trainee zinga mi Pi Lalrinliani chu training chhunga Pathian hruaina avanga lawm thu sawiin a tawngtai a. Training petu Central Silk Board (CSB)-a Project Assistant Pu Lalramchuana chuan report a pe a. Trainee-te atangin training an hlawkpui dan ngaihthlak niin, hriat fiah duh an neihte pawh zawtin, hrilhfiah an ni a. Chawki chaw pek dan a taka thlir ho a nih bakah, Khuallian Pu R. Lalremsanga, Lawngtlai DIPRO Pu C. Lalhruaitluanga leh DRDA APO Pi Lalramliani te paw’n chaw hi pe ve chhinin, pangang no chu a tray-in trainee-te hnenah an hlan bawk. 

He ni 10 awh chawki rearing training hi April ni 2, 2018 atang khan neih tan niin, ISDP beneficiary mi 10 an tel a. Riah chilhin chawki enkawl dan hi an zir a, zingkar atanga zan thim hnu thlengin training hi an nei thin a ni.