Vawiin khan Lunglei DC Conference Hall-ah Additional DC Pu Benjamin Lalzama kaihhruaiin April Ni 16-a neih tan tur Measles Rubella Vaccination Campaign kalpui dan tur sawihoin District Task Force for Immunization an thukhawm. He hunah hian a kaihhnawih sawrkar department hotute bakah YMA, VC Association, MHIP leh Mizoram Independent School Association hotute an tel.

Pu Benjamin Lalzama chuan MR Vaccination Campaign hlawhtlinna tura nasa taka hma la tu DTFI member-te, a bik takin Health & Family Welfare Department-a hnathawkte inpekna leh thawhrimna chu fakawm a tih thu a sawi a. Sentut leh Rubella natnate tikiam turin Sawrkar Laipuiin ruahmanna a siam angin naupang thla 9 pumhlum atanga kum 15 hnuailam ten MR Vaccine an lak vek a tul a ni tiin heng natna awm thei laka Lunglei District a fihlim theih nan mitin ten tan kan lak tlan a tul takzet a ni, a ti.

He hunah hian Lunglei CMO Dr Thani Pachuau leh Lunglei SMO leh DIO ni bawk Dr Lalrinthangi te pawhin thusawina hun hmangin Sentut leh Rubella natna chungchang leh hri danna pek kawnga ruahmanna an siam tawh leh hma an lak dan tur an sawifiah a. He beihpuithlakna ti hlawtling tura DTFI member-te hriat tur pawimawh hrang hrang leh an mawhphurna te an hrilhfiah bawk. Sentut leh Rubella Vaccine chu a him tawk thu tarlangin India ram state 15-ah he MR beihpui hi thlak tawh a ni a, naupang vaibelchhe 8 MR Vaccine pek tawh niin MR Vaccine lak avanga insawisel, Damdawiin panpui engmah report a awmloh thu Health Department hotute hian an tarlang bawk. Measles leh Rubella natna te hi nunna atana hlauhawm an nih avangin naupang thla 9 leh kum 15 inkar tawh phawt lak tir vek turin Health Department chuan Lunglei District mipuite a ngen a ni.

Lunglei District-a Measles Rubbella Vaccination Campaign Programme hawnna kalpui dan tur pawh sawiho niin a hawnna hi April ni 16 zing dar 9:00 ah Southern Flower School ah neih ni se tih committee chuan a rel. 

Tun dinhmunah Lunglei District-ah hian hri danna la thei tur thla 9 leh kum 15 inkar naupang 40,873 awma chhut niin  naupang chiu-na hmun tur 732 ruamhan fel tawh a ni. School hrang hrang, Anganwadi, Sub Centre leh damdawiin ah te vaccine hi pek an ni ang. He beihpuithlak tan atanga kar hnih chhung hi school hrang hrang kal chilhin school naupangte vaccination pek an ni ang a. Hemi hnu a kar hnih dang chu Anganwadi, Sub Centre leh hmun remchang dangah pek a ni leh ang. Chawlhkar nga na ah target phak lo dan a zirin Sweeping Phase nei turin ruahmanna siam a ni bawk.