Vawiin khan Economics & Statistics Department bul tumin Lawngtlai DRO Conference Hall-ah Lawngtlai District chhunga Lai Autonomous District Council (LADC) huam chhunga piang leh thi chhinchhiahtu (registrar of births & deaths - RBD)-te tan intuaitharna (annual training for 2019-2020) buatsaih a ni.

Vawiina Annual Training on Civil Registration System hmanpuitu Additional DC Pu B. Lalchhawntluanga, MCS chuan piang leh thi chhinchhiah hna thawktute chuan an hna pawimawhna an hriat chian phawt chuan inthlahdah tak leh dik lo taka thil tih an duh a rin loh thu sawiin, ram dinhmun chhinchhiahtu an nih avangin an hna chu fimkhur tak leh dik taka thawk turin RBD kal khawmte chu a chah a. An hnaa an rinawm loh chuan an zahawmna a tlak hniam piah lamah ramin a tuar dawn a, ram pawi sawina a ni dawn a ni, a ti.

Vawiina hun hman hi Economics & Statistics Department-a Deputy Director Pi Biakthansangi Hrahsel chuan kaihruaiin, Lawngtlai District chu Myanmar leh Bangladesh nen ramri thui tak intawm a nih avangin RBD-te chuan fimkhur taka hna an thawh a pawimawh hle a ni, a ti.

He hunah hian Election Officer Pu Lalremruata Sailo leh Judicial Magistrate 1st Class Pi S. Ngotlia te pawhin thu sawiin, District Research Officer Pi H. Chhunkungi'n lawm thu sawina hun a hmang a. Inspector of Statistics Pi Lalfakawmi leh Pu Ricky Lalhriatpuia te'n training hi an pe a, sawi hona hun hman a ni bawk.

Kum tina neih thin he annual training hi ni hnih awh tur a ni a. Naktuk hian RBD-te’n piang leh thi an chhinchhiahna register te endik leh kum thar atana hmanraw mamawh semin hun hman a ni ang.

Lawngtlai District chhungah hian Lai Autonomous District Council huam chhungah Registrar of Births & Deaths 84 awmin, Chakma Autonomous District Council huam chhungah 51 an awm mek a ni.