Vawiin hi 'khawvel pum huap naupangte ni' (universal children's day) a ni a, hemi pual hian Lawngtlai District Child Protection Unit (DCPU) huaihawtin Lawngtlaia Central YLA playground-ah naupangte intihhlimna kut (children carnival) buatsaih a ni.

Lawngtlai Bawrhsap Pi Shashanka Ala, IAS chuan khuallian niin he children carnival hi a hawng a. Universal children's day chu naupangte nun hlimawm leh thianghlim tak lawmna a nih ang ngeiin naupangte'n hlim taka hun an hmanna tur carnival buatsaih a ni chu lawmawm a tih thu sawiin, naupangte chu chhungkua leh khawtlangah an himin an hlim tur a ni a, naupangte himna leh hlimna tur ngaihtuah chu mi tin mawh a ni, a ti.

Khual zahawm, Lawngtlai Superintendent of Police Pu Amit Goel, IPS chuan naupangte chu ram hma hun innghahna an nih avangin sei lenna boruak tha kan siamsak tur a ni, a ti a. Naupang chunga hleilenna hrang hrang do leh naupangte'n hum sual an dai lohna tura venhim chu khua leh tuite mawh phurhna a ni, a ti.

Carnival hawnna hunah hian naupang thahnem tak leh anmahni hruaitute bakah, sawrkar department hrang hrang officer-te leh tlawmngai pawl hruaitute an tel a. District Child Protection Officer Pi Mary Lalremruati chuan kal khawmte lawmna thu leh universal children's day chungchang a sawi a. Don Bosco School Children's Choir te'n hawnna hla sain, Downtown English School naupangte'n lam hmuhnawm tak an entir a. DCPU-a Protection Officer (Institutional Care) Pi PC Malsawmtluangi'n lawm thu a sawi hnuin carnival hi tan a ni.

He carnival-ah hian naupangte intihhlimna tur infiamna hmanraw hrang hrang chhawp niin, thil intihsiaka lawmman dawn theihna tur eng emaw zat ruahman a ni a. An thil dah langsar zualte chu - bouncy castle, nailart, karaoke leh photobooth chi hrang hrang te a ni. Carnival hi naupangte'n an hlut hle a, sikul tam takin he carnival chhim tur hian zirlaite chawlh an pe a, sikul thenkhat atang chuan zirtirtutehovin an zirlaite an hruai a, nu leh pa tam takin an fate hruai bawk.

He carnival-a lawmmante hi a buatsaihtu Social Welfare Department lam bakah, sawrkar department eng emaw zatin an tumsak a ni.

Universal children's day hi kum 1954 khan a tum khat nan United Kingdom-ah hman a ni a. Naupangte'n an dikna chanvo leh hamthatna an chan theih nana an puala ni serh niin, kum tin November ni 20-ah hman thin a ni a. Ram hrang hrangin naupangte ni hi nei hrang thluah mah se, November ni 20 hi khawvel pum huapa naupangte ni atana hman a ni ta zel a ni.