Lawngtlai District Level Committee on Pradhan Mantri Jan Vikas Karyakram (PMJVK) chu nimin (20.11.2019) khan Lawngtlai DC Conference Hall-ah an Chairman, Lawngtlai Bawrhsap Pi Shashanka Ala, IAS hovin an thu khawm.

He hunah hian kum 2019-2020 atana Lawngtlai District chhunga block pathum - Bungtlang 'S', Chawngte leh Lawngtlai Block huam chhunga PMJVK hnuaia hma sawnna hna thawh tur ruahmanna hrang hrang rawtna te thlir ho a ni.

PMJVK hi a hma chuan Multi-sectoral Development Programme (MsDP) tia hriat a ni thin a. Ram bial khat chhunga hnam tlem zawk (minority)-te chawi kanna tura ruahman niin, hemi hnuaiah hian khawtlang mipuite mamawh hrang hrang phuhru turin hma lak thin a ni a; sikul, damdawi in, anganwadi centre, tui lak leh vantlang hmun pawimawh te sak thin a ni.

Nimin thut khawmah hian Chakma Autonomous District Council (CADC) chief executive member Pu Rasik Mohan Chakma bakah, line department hrang hrang ai awh te, Lai Autonomous District Council ai awh te leh tlawmngai pawl ai awhte an tel a. PMJVK hnuaia kum thara hna thawh tur rawtna awm sate thlir ho niin, siam rem ngai laite siam rem a ni.