2900/2022-2023
Pawlkut thla ni 1, 2022: Vawiin khan Economics & Statistics Department huaihawtin Lawngtlai BDO Conference Hall-ah Lawngtlai District chhunga Lai Autonomous District Council (LADC) huam chhunga piang leh thi chhinchhiahtu (registrar of births & deaths - RBD)-te tan intuaitharna, annual training buatsaih a ni.
Vawiina LADC area-a RBD-te tana annual training buatsaih hi Lawngtlai Bawrhsap Pu Amol Srivastava chuan hmanpuiin, hawnna thu a sawi a. Piang leh thi chhinchhiah hna thawktute chu ram hnuk khawih thil khawihtu an nih avangin inthlahdah tak leh dik lo taka hna an thawh a rem loh thu sawiin, fimkhur tak leh dik taka thawk zel turin RBD kal khawmte chu a chah a. Sawrkar kalphung leh hna thawhnaah thil thar a awm fo avangin training ngaih pawimawh a ṭul thu sawiin, ṭha leh felfai zawka hna an thawh theih nan training-a an thil zirte ngunthluk taka zir a, a taka hman ṭangkai tum turin a chah a ni.
Khual zahawm, Economics & Statistics Department-a Deputy Director (RBD) Pi B. Vanlalrengi chuan India ramah digitised birth certificate leh death certificate hman ṭan mek a nih thu leh seal leh signature a awm loh avangin mi tam takin certificate lem anga an ngaih thu sawiin, digitised certificate-a barcode chu phone-ah emaw QR code scanner hmanga scan-in, Registrar General of India (RGI) website-a a awm leh awm loh a endik nghal theih avangin digitised certificate-ah a lem a awm thei lo va, chu vangin certificate rin tlak zawk a nih thu a sawi a. RBD kal khawmte chu daily report leh monthly report ngai pawimawh lehzual turin a chah bawk.
Vawiin training hi Lawngtlai District Research Officer (DRO) Pu Jimmy Lalkungliana Sailo chuan a kaihruai a. Inspector of Statistics-te Pu J. Ramdinmawia, Pi Lalfakawmi leh Pu Ricky Lalhriatpuia te'n Civil Registration System chungchangah training an pe a. Inspector of Statistics Pu H. Lalkhawngaiha kaihhruaiin zawhna leh chhanna leh sawi hona hun hman a ni bawk.
He training-ah hian birth/death certificate lehkha aia a chhinchhiahna bupui (register)-a chuan a pawimawh zawk thu tar lan niin, RBD-te chu certificate pek chhuah aia ziah luh fel ngai pawimawh hmasa turin chah thar an ni a. India khua leh tui dik tak ni lote hnena birth certificate pek chhuah a nih loh nan fimkhur lehzual turin chah thar an ni bawk.
Kumin October ni 31-a 21st Inter-departmental Coordination Committee (IDCC) ṭhu khawm chuan raltlan leh dan phal lohva ram dang mi India ram chhunga lo lutte chu an fate India ram chhungah piang mah se, India khua leh tuia chhiar lo tur leh birth certificate pe chhuak lo turin thu tlukna a lo siam tawh a ni.
Vawiina RBD annual training buatsaihah hian RBD-te’n piang leh thi an chhinchhiahna register te endik niin, kum thar atana hmanraw mamawh sem a ni bawk.
Tun dinhmunah Mizoram pumah piang leh thi chhinchhiahtu, registration unit 869 an awm a. Lawngtlai District chhungah hian Lai Autonomous District Council huam chhungah Registrar of Births & Deaths 84 awmin, Chakma Autonomous District Council huam chhungah 53 an awm mek a. Kumin January - October inkarah Lawngtlai District chhungah nau piang 2,116 leh mitthi 490 chhinchhiah an ni.
Mizorama district 11-a DRO office-ahte October 2021 aṭang khan digitised birth/death certificate hman ṭan a ni a. Registration unit hrang hrangah pawh hman thuai tum niin, digitised certificate veka kalpui theih thuai tum a ni.
Birth certificate hi naute a pian aṭanga ni 21 chhungin RBD hnenah a thlawna lak theih a ni a; ni 22-30 inkarah late fee ₹ 10/- leh certificate man ₹ 100/- (a vaiin ₹ 110/-) chawiin RBD aṭangin lak theih a ni a; ni 31-365 inkarah chuan DRO office-ah late fee ₹ 100/-, certificate man ₹ 100/- leh application form man ₹ 20/- (a vaiin ₹ 220/-) chawia lak a ngai a; kum khat chin hnu lam phei chu Executive Magistrate hriatpuiin ₹ 1,320/- chawiin delayed registration tih theih chauh a ni.
Attachment
- Loading attachment...
