2901/2022-2023
Dated Serchhip, the 1st December, 2022: Vawiin khan Serchhip Auditorium ah World AIDS Day, 2022 pualin MSACS Serchhip leh District AIDS Prevention & Control Committee (DAPCC) Serchhip te buatsaihin hun hman a ni a. Pi Nazuk Kumar, IAS, bawrhsap chu khuallian a ni.

Serchhipa High School leh Middle School zirlai naupangte tana AIDS day pual lem ziak intihsiakna neiha bul tan niin zirlai naupang zahnih chuangten intihsiakna an nei a. High School naupangte lemziak thupui chu "Inchiuna inhmantawm thatlohzia" tih niin Middle School zirlaite thupui chu "Engtinnge Drugs kan pumpelh theih ang" tih a ni.

Painting Competition neih zawh hian Dr. Lalnunhlima Khiangte, District AIDS Control Officer kaihhruaiin inkhawmna buatsaih zui a ni a, Pi Nazuk Kumar chu khuallian a ni. Bawrhsap chuan World AIDS Day hmang tura kalkhawmte chu chibai bukin, HIV/AIDS chu enge a nih kan hre tlang viau tawh nain a invenna lamah nasa zawka tan kan lak a tul hle mai. Mizoramah he natna kan inkaichhawnna bul ber te chu invenna tel lova mipat hmeichhiatna hmansual (Sex) leh Drugs inchiuna (Drugs Abuse) atang tein a ni a, hei hian kan nun kan uluk a tulzia a tichiang hle. Thalaiten kan nun vawng uluk ila, he natna laka himna kawngte nasa takin i sawi darh ang u. Mizoramah HIV/AIDS vei kan tam tawh avangin he natna hi hri dangte mipui nawlpui kara a leng ang thovin a leng darh ve tawhah ngaih a ni hial tawh a, kan dinhmun hi a tha lo a ni. Tin, he natna tuar mekte pawhin tha taka damdawi kan lak a pawimawh hle a, kan inenkawl that chuan dam tha takin hun rei tak kan awm thei tih kan hrereng dawn nia. Inrinhlelhna neite phei chuan hreh hauh lova in test vat a tul tak zet a, chu chu mahni leh midangte tan a ni. Serchhip district a kan ART Centre leh ICTC ten hna an thawk tha em em a, a mamawhtu apiangten inthlahrung hauh lovin i hmang tangkai ang u, tiin mipuite a sawm a ni. Pi Nazuk Kumar hian lemziak Intihsiaknaa tithate lawmman a hlan nghal a ni.

He hunah hian Dr Lalnunhlima Khiangte DACO Serchhip hnen atangin HIV/AIDS nihphung te, a hlauhawm dan leh inkaichhawn awlsam dan hrang hrangte bakah HIV/AIDS laka in ven dan kawng hrang hrang ngaihthlak leh thlirho a ni a, Dr Lalzawmi Chief Medical Officer(CMO) pawhin tihdam aia inven a that zawk thu ngaihthlak a ni bawk.

Kumin World AIDS Day thupui  atan hian "Equalize" tih thlan a ni a. HIV/AIDS darh zel tur thapui thawha do a tul tak zet tih hmuntin kiltina tlangaupui a tulzia sawina auhla a ni.