2902/2022-2023

Champhai, the 1st December, 2022: Champhai District AIDS Prevention Control Committee (DAPCC) buatsaihin vawiin chawhnu dar 1 khan Govt. GM High School Assembly Hall-ah 'Intluktlanna' tih thupui hmangin World AIDS Day 2022 puala hun hman a ni a, he hun hi DAPCC Chairman, Pu James Lalrinchhana, District Bawrhsap chuan khuallian niin a hmanpui a ni.

Khuallian Pu James Lalrinchhana chuan kalkhawmte chu World AIDS Day hman chhan hre renga ngaihtuahna seng tura fuihin, World AIDS Day chu WHO hmalaknain kum 1988 December ni 1 atanga hman tan a ni, a ti a. AIDS natna tihbaiawm tak darh zel loh nan finna leh thiamna inpek chhawn zung zung a tul thu sawiin, khawvelin theihtawp a chhuah chunga AIDS vei an pun belh zel thu leh khawvel ram pum a fanchhuah tawh thu a sawi a. AIDS chu ngawi renga ram leh hnam, sum leh pai runtu a ni a, kan ngaihthah thiang lo a kan buaipui char char angai a ni, a ti bawk.

AIDS veilo tura pawimawh ber chu thuawihna anih thu tarlangin, humsual dai theihna tura thlemnate hneh thei tura tan la turin kalkhawmte a chah a. AIDS veite thinhrik leh enhran thinna tun hmaa awm thin chu zirchianna leh thiamna hmanga finfiah anih hnuah paiha kalsan anih tawh thu sawiin, kalkhawmte chu AIDS veite endawng mai lova intluktlanna leh inpawhtlanna ngaipawimawh turin a chah a. Ram hrang hrangte inkarah inpawhtlang taka thawhhona a awm thu sawiin, thangthar zelte tana invenna chungchang zirtirna kalpui nasat a tul thu pawh a sawi a. District huapin HIV/AIDS laka fihlim tura inzirtirna Zoram Harh Rawh Campaign tunhnaiah kalpui anih thu pawh tarlangin, ruihhlo hluar leh AIDS darh zel tur do kawngah zirna in, pisa, kohhran leh khawtlang anga theihtawp chhuah anih thu a sawi a, beidawng mai lovin kan kalpui zel dawn a ni, a ti a. Zirlai nakin lawka ram leh hnam innghahna turte chu an nun tibuai theite kalsana, nunkawng dik leh tha zawh hram hram turin a fuih a. Taksa leh rilru hriselna ngaipawimawh fo turin a chah nghal bawk.

Thusawitu dang Pu T. T. Laltanpuia, DEO Champhai chuan World AIDS Day puala hun hman chuan AIDS do kawnga hmalakna thar leh rah chhuah tha a thlen ngei a beisei thu a sawi a. AIDS do kawngah tha leh zung senga bultan thar angaih thu sawiin, kalkhawmte chu mahni theuh bakah midangte zirtir chhawngtu leh entawntlak ambassador ropui tak nih tum turte leh malsawmna thlentu nih tum turtein a sawm a ni.

He hun hi Dr. R. Lianmawia, Chief Medical Officer, Champhai District chuan a kaihruai a. Pi Vanlalruatpuii Ralte, Counsellor, Mobile ICTC-in HIV/AIDS chungchanga hriat tul hrang hrangte zirtirna powerpoint presentation kaltlangin a nei a. HIV/AIDS do leh him nana inzirtirna hmanruate sem chhuah a ni a. Pi Lalhruaitluangi, SDEO Champhaiin lawmthu sawiin hun a khar a ni.

Vawiin chawhma dar 10 khan World AIDS Day 2022 pual hian thupui thlan bik hmanga lem inziahsiak zirlaite tan buatsaih a ni a. He hunah hian lawmmante sem chhuah nghal a ni a. World AIDS Day 2022 puala thupui thlan bik hmanga inzirtirna lam hawia lem inziahsiak result kimchang chu hetiang hi a ni:

A) Middle School Section:
1. Esther Vanlalhriatpuii, Holy Mission School
2. H.T Malsawmtluangi, Springdale Academy
3. Vanlalrinawma, PES Vengthlang

B) High School Section:
1. C.Lalrintluanga, Pine Hill Adventist Academy
2. Ramdingliani, Home Mission School
3. Vanlalruatpuii, Bethel High Sçhool

C) Higher Secondary School Section:
1. Rualchhingi, Govt. GM HSS
2. Lallawmawma, Champhai HSS
3. Lalrindika, Champhai HSS

Lem inziahsiakah hian School 22 atangin Zirlai 102 an tel thei a; pakhatna hian pawisafai Rs 1,000/- leh certificate a kengtel a, pahnihnain Rs 700/- leh certificate, pathumnain Rs 500/- leh certificate a kengtel bawk.