2903/2022-2023

Aizawl 1st December 2022: Mizoram Engineering Service Associotion chuan vawiin khan Multipurpose Hall, Berawtlang-ah Annual General Conference vawi 41 na an hmang a, Deputy Chief Minister Pu Tawnluia chu Khuallian niin, chawhnu session a hmanpui.

Deputy Chief Minister Pu Tawnluia chuan engineer te chu hmasawnna ruhrel thlen nana sulsutu an ni a, thiamna chi hrang hrang khirhkhan tak neiin degree sang tak tak pass in, ram tan thiamna hmanga mipuite rawngbawl turin sawrkar kut ke an ni tih inhre nawn leh turin a chah a. Kawng tha, tui in tur thianghlim bakah eng awm tura hnathawktu, thluak bur awmkhawm an ni tih sawiin Mizoram Engineering Service Association member zawng zawngte an thiamna leh finna te hmang tam leh zual turin a sawm a. Thil thar ngaihtuah zawnga ngaihtuahna hman tam a pawimawh zual tih sawiin, engineer te chu a bika penchhuak zel turin a sawm nawn lehin, kan ramin chhawr bawkna lian tak a nei ang tiin a sawi. Thiamna finna nena hmathlir mumal tak nen, tuchhuan lo kal leh zel turte thlenga chhawr theih tur hmasawnna ruhrel kan neih zel theih nan ngaihtuahna hmanga inpekna thuk tak nena hnathawk zel turin leh an kal zelna turah duhsakna a hlan nghal a ni.

Khuallian chuan Mizoram Engineering Service Association-a Department pathum- PWD, PHE leh P&E te chu hnathawh that lama inelna thianghlim siam thin tura chahin, sorkar hnathawkte chu sorkar neitu an ni tih hre reng turin a chah bawk a ni.

Chawhma khan Business Session neih a niin service kaihhnawih - Post fill up; MES (Combined Competitive Examination) Regulations; Engineers Centre te sawihoin hmalak chhunzawm dan tur rel a ni a. Service Rules siamtha tura DP&AR rawtna te, Association Constitution siamtha tura DP&AR rawtna pawh buaipui mek a nih dan te hrilhfiahna leh sawihona neih a ni a. Chawhnu session hi Association President Er. Lalropuia'n a kaihruaiin member thar mi pasarih lawmna hun a hmang a. General Secretary Er. Benjamin L.Tlumtea hnen atangin annual report ngaihthlak a ni a, member thi mi pasarih sunna hun neih a nih bakah pensioner mi sawmhnih thlahna hun hman a ni bawk a. Vice President Er. H. Zoramliana'n lawmthu sawiin he hun hi a khar a ni.

MESA-ah hian member 369 an awm mek a, a din tirh kum 1972, May ni 14 khan member 8 chauh an awm a ni. A tirah chuan Assam Engineering Service Association - Aizawl Zone tih a ni a, chumi hnuah Mizoram Engineering Service Association ti a hming thlak a ni.

Attachment

  • Loading attachment...