Lawngtlai District Level Committee on Pradhan Mantri Jan Vikas Karyakram (PMJVK) chu vawiin khan Lawngtlai DC Conference Hall-ah an Chairman, Lawngtlai Bawrhsap Pi Shashanka Ala, IAS hovin an thu khawm a. Kum 2019-2020 atana Lawngtlai District chhunga PMJVK hnuaia hna thawh tur rawtna hrang hrang an thlir ho.

Chairman Pi Shashanka Ala chuan line department hrang hrang atanga member kal khawmte chu project thara hma lakna turah anmahni kaihhnawih hnate tha taka thawh a nih theih nana vil uluk tur leh tun hmaa hna thawh zawh tawhte pawh neitu thinlung pua enkawl zui turin a chah a. Sawrkar laipui ruahmanna thar hnuaia hna thawh tur thar rawt zung zung a, thawh zawh tawh sa hlamchhiah a, hman zui leh si loh chu bansan a hun tawh tiin, District hma sawnna atana thil tangkai tak tak chauh rawt a, a nih tur ang taka hman leh enkawl zui a pawimawh a ni, a ti.

PMJVK hi a hma chuan Multi-sectoral Development Programme (MsDP) tia hriat a ni thin a. Ram bial khat chhunga hnam tlem zawk (minority)-te chawi kanna tura ruahman niin, hemi hnuaiah hian khawtlang mipuite mamawh hrang hrang phuhru turin hma lak thin a ni a; sikul, damdawi in, anganwadi centre, tui lak leh vantlang hmun pawimawh te sak thin a ni.

Vawiin thut khawmah hian line department hrang hrang ai awh bakah, tlawmngai pawl ai awhte an tel a; PMJVK hnuaia kum thara hna thawh tur rawtna awm sate thlir ho niin, siam rem ngai laite siam rem a ni a, rawtna thar thlen lehna hun hawn belh niin, rawtnate chu sawrkar laipui Minority Affairs Ministry-ah thawn thlak leh tur a ni.