Sawrkar laipuiin nu nau paite'n hriselna tha zawk an neih theih nana hma lakna a kalpui, Pradhan Mantri Matru Vandana Yojana (PMMVY) Week - Matru Vandana Saptah-2019 chu vawiin khan DRDA Lawngtlaia Project Director Pi Marilyn Rualzakhumthangi'n Lawngtlai DRO Conference Hall-ah a hawng.

Pi Marilyn-i chuan hmeichhiate hamthatna tura sawrkar hma laknate a dawng thei tur zawn chhuah leh kawng kawhhmuh kawngah thawktute chu thahnem ngai zual turin a chah a. Hmeichhiate chu an pasalte chhungkuaah lutin, inthlahrung takin, mahni mamawh leh hriselna tur pawh ngaihtuah ngam lovin an awm thei a, sawrkar laipui chuan hmeichhe dinhmun dawm kan nana hma lakna hi a ngai pawimawh tak zet a ni, a ti.

Hapta hawnna inkhawm hi Lawngtlai ICDS-a District Programme Officer Pi Vanlalhruaii'n a kaihruai a. District Project Coordinator F. Lalengvari'n PMMVY chungchang sawiin, fa tir pai leh hring hmeichhiate'n sawrkar atanga tanpuina Rs 5,000/- an dawn theih thu leh, dan anga an inziah luh a, tih tur tul an tih fel hnuah Rs.5,000/- chu instalment thuma pek chhuah tur a nih thu a sawi a. Tun dinhmunah Lawngtlai District-ah PMMVY tanpuina dawng tura inziak lut mi 1095 an awm tawh thu a sawi.

He hunah hian kal khawmte atanga thu sawi duh tan hun hawn a ni a. District Programme Assistant Z. Laldinhuala'n lawm thu sawiin hun a khar a ni.