New Delhi-a cham mek Chief Minister Pu Zoramthanga chuan vawiin khan Jal Shakti Minister Pu Gajendra Singh Sekhawat chu a pisaah a kawm a. Mizoram mipuiten Jal Jeevan Mission hnuaia tui thianghlim hnianghnar taka hman tur an neih dan tur an sawi dun.

Jal Shakti Minister chuan Jal Jeevan Mission hnuaia Mizoram hmalakna chu fakawm a tih thu leh mamawh hrang hrang an la neih te pawh state mila project siam tura hrilhin a lo enzui tur thu a hrilh a. Chief Minister-in Mizoram tlawh tura a sawmna pawh pawmin kum thar a lo zin a tum thu a sawi bawk.

Vawiin vek khan Chief Minister hian Airport Authority of India hotute chu an office ah a kawm a. Lengpui Airport tihchangtlun zel dan tur te, thlawhna tam zawk service tir dan te leh bungraw phur thlawhna service tir theih dan tur te an sawiho.

CM Pu Zoramthanga hi Planning Vice Chairman Pu H.Rammawi, Chief Secretary Pu Lalnunmawia Chuaungo leh official dangten an tawiawm a ni.