Vawiin khan Lawngtlai District Committee on Integrated Action Plan for Pneumonia and Diarrhoea (IAPPD) chu an chairman district Bawrhsap Dr A. Muthamma IAS hovin a chamber-ah an țhu khawm a. Lawngtlai District chhunga pneumonia leh kawthalo vanga naupang thihna tihtlem a nih theih dan tur kawng hrang hrang an sawi ho.

Lawngtlai DC chuan Mizoram District pariat zinga a hnufual ber leh hnufum ber ni reng lo tura tan lak a pawimawh thu sawiin, member-te chu ngunthluk taka an ngaihtuahna seng turin a sawm a. District hriselna atana hna thawh chu mi tin mawhphurhna a ni, a ti.

He hunah hian IAPPD hnuaia line department hrang hrang - Social Welfare, Education, PHE, RD, LAD leh PWD te'n Health Department nen tang tlanga hma lakna tur hrang hrang an neih te sawi ho a ni a. Pneumonia leh kawthalo hi khawsakna hmun tawp lutuk te, tui thianghlim hman tur neih loh vang leh zun leh ek thiarna mumal awm loh vang tea thleng thin a nih avangin, anganwadi centre, sikul leh damdawi ina inthiarna hmun tha tak buatsaih te, zirlai leh naupangte hnena kut sil fai dan zirtir te, khawtlang vawn fai kawnga hma lak te, nunphung hrisel pu darh tura anganwadi worker, health worker leh zirtirtute kaihhruaina training buatsaih te chu tih tur tul hmasa nia an hriat thu an sawi a. Health department lam hotute chuan naupang an lo hrisel zawk nan nausen chu thla 6 a pumhlum thlenga nu hnute chauh pek tur a nih thu te, thla sarih atanga kum 2 a pumhlum thlengin chaw dang (complementary food) leh nu hnute pek kawp tur a nih thu leh kum 2 an pum hmaa nau hnute ngheitir loh hram a that thu te an sawi bawk.

Khawvel puma naupang thihna za zela sawmhnih  pakua (29%) hi pneumonia (chuap natna) leh kawthalo vanga thleng a ni a. Hei vang hian kum tin naupang maktaduai 2 chu thi ziah ang an ni. He'ng natna chi hnih vanga naupang thihna thleng thin hi tihhniam a nih theih nan kum 2013 khan UNICEF leh WHO hnuaiah Global Action Plan for Pneumonia and Diarrhoea (GAPPD) chu din a lo ni a. Hei hi India pawhin zawm ve nghalin, IAPPD hi duan a lo ni ta a ni. Hemi kawnga hma lak dan tur chipchiar leh fel zawka duang turin August ni 31 leh September ni 1, 2017 khian Chaltlanga State Guest House-ah state level consultative workshop on IAPPD & India Newborn Action Plan (INAP) chu buatsaih tum a ni.

 

 

Attachment

  • Loading attachment...