Vawiin khan Krishi Vigyan Kendra (KVK), Kolasib District buatsaihin Parish Hall, Venglai Kolasib-ah Sankalp Se Siddhi-Kuthnathawktute pualin hun hman a ni a, Kolasib bialtu MLA Pu PC Zoram Sangliana’n a hmanpui.
He hunah hian Pu PC Zoram Sangliana chuan kuthnathawktute dinhmun chawikan leh hlawk zawka an tharchhuahte an hralhchhuah chu a duhsam ber anih thu sawiin, hemi kawngah hian hmalak zel a ni a, tunah sorkar laipuiin mahni intiamna hmangin hma a la chhunzawm a ni a ti a. Kuthnathawktute chu mithiam zawkte rawn hreh lo tur leh tamtak thar thei tura hmala turin a fuih a ni. Sankalp Se Siddhi puala kuthnathawktute’n kum 2022-ah chuan hlawkna a leta an neih theihnana thu tiam Pu PC Zoram Sangliana kaihruaina hian neih a ni bawk.
Vawiin hun hmanah hian District Bawrhsap Dr.Arun T., IAS pawhin thu a sawi a. Kolasib-a Kuthnathawktute chawikan nana hnathawktu sorkar Department - District Horticulture Office, District Agriculture Office leh District Veterinary Office atang kuthnathawktute tana hmalakna tur thar leh hmasawnna awm theite ngaihthlak anih bakah NABARD atang leh Bank dang atanga tanpuina pekchhuah theih hrang hrang te he hunah hian tarlan a ni.
Sankalp Se Siddhi hnuaiah hian kum 2022 ah chuan kuthnathawktuten tuna an tharchhuah atanga an lakluh let thawk (Doubling Farmer’s Income) an lakluh theihnan kuthnathawktute bakah sorkar line department hrang hrang ten hmalakna tha zawk nena hma an lak theih nan intiamna neih a ni a. Heng intiamna hi damdawi hlauhawm tello huan/ram neih te, Soil Health Card siamte, Integrated Agriculture System hmanga huan enkawl leh sawngbawl te, thlai tharchhuah dahthatna leh sawngbawlna tur him leh tha neih te, khuarel chhiatna avanga kuthnathawh hlawkna seng theihloh a awmloh nan Crop Insurance tih te ah intiamna neih a ni.
