4474/2023-2024

2024 Ṭau thla ni 8: Vawiin chawhma khan Lawngtlai DC Conference Hall-ah Lok Sabha Inthlanpui 2024 atana 1-Mizoram Parliamentary Constituency chhunga Police Observer atana ruat Pu K. Satyanarayan, IPS leh Expenditure Observer Pi Anita Rinesh, IRS te hovin Lawngtlai District leh Siaha District-a official-te leh political party ai awhte nen inpuahchahna hrang hrang thlir hovin meeating buatsaih a ni.

He meeting hi Lawngtlai District Election Officer Pu Cheemala Siva Gopal Reddy, IAS chuan kaihruaiin, Lok Sabha Inthlanpui lo awm tur atana Lawngtlai District inpuahchahna dinhmun tlangpui a tar lang a. Lawngtlai leh Siaha SP-te'n boruak muanawm tak hnuaia Lok Sabha Inthlanpui felfai leh thianghlim tak a awm theih nana Police te inpuahchah dan, hma lak tawhna leh hma lak mek te leh hmachhawp hrang hrang an neihte chu powerpoint presentation hmangin an entir a. Election Expenditure Monitoring Nodal Officer, Lawngtlai leh Siaha te'n election expenditure kaihhnawih thil an vil dan (monitoring) leh an hma lak dan te chipchiar takin powerpoint presentation hmangin an entir bawk.

Police Observer Pu K. Satyanarayan leh Expenditure Observer Pi Anita Rinesh te chuan Lok Sabha Inthlanpui atana Lawngtlai District inpuahchahna chu ṭha thawkhata an hriat thu sawiin, DEO leh election official-te leh mawhphurhna hrang hrang neite hnenah an thawh rimna leh inpekna avangin lawm thu an sawi bawk a ni.

Police Observer Pu K. Satyanarayan chuan Mizoram chu state ralmuang leh a mi chengte pawh dan zawm ṭha an nih avangin inthlan muanawm leh felfai tak a awm leh ngeia a rin thu sawiin, chutih rual chuan venhimna thilah inthlahdah leh inthlahdul a thiang chuang lo, a ti a. Inthlanpui kaihhnawiha venhimna kawnga tih tur ruahman hrang hrangte chu ṭha taka hlen chhuak turin police lam hotute chu chahin, ruahmanna felfai zawk a awm theih nana rawtna a neih hrang hrangte a sawi bawk.

Expenditure Observer Pi Anita Rinesh pawhin inthlan felfai leh thianghlim a awm theih nan candidate-te chet velna leh sum hman dan chu uluk taka vil a ṭul tih sawiin, expenditure monitoring hnuaia team hrang hrang leh committee te chu theih tawp chhuah chhunzawm zel turin a chah a. A bik takin cVIGIL application kal tlanga complaint lutte chu rang taka bawhzui thei tura inralring reng turin a chah a ni.

Lawngtlai District chhungah hian assembly bial pathum awmin, a zavaiin polling station 181 a awm a. Chu'ng zinga polling station 20 chu hmeichhe hlangin inthlan an buaipuina tur a ni a. Lawngtlai District chhungah tun dinhmunah venhimna uluk ngaih zual bikna critical polling station a awm lo va. Assembly bial tinah hian inthlan campaign kalpui danah dan bawhchhiatna a awm lohna tur leh felfai taka kalpui a nih theihna tura viltu, Flying Squad Team 2 ṭheuh, Static Surveillance Team 2 ṭheuh, Accounting Team 1 ṭheuh, Video Surveillance Team 1 ṭheuh, Video Viewing Team 1 ṭheuh leh Assistant Expenditure Observer pakhat (1) ṭheuh an awm a. Print, electronic leh social media vil turin District MCMC a awm bawk.

Vawiin meeting-ah hian nodal officer-te, sector magistrate-te, expenditure monitoring hnuaia team hrang hrang leh committee te, media leh political party ai awhte an kal khawm a. Lawngtlai DC Conference Hall-a meeting neih zawh hian Police Observer leh Expenditure Observer te hian Govt Lawngtlai College-a EVM dahna strong room chu tlawhin an enfiah nghal a ni.