1073/2023-2024

2023 Vawkhniahzawn thla ni 7: Mizoram sawrkarin Lawngtlai District-a accredited journalist-a a thlante Press Accreditation Card (PAC) hlanna hun leh District MJA member-te tana "journalists' workshop" chu vawiin khan Lawngtlai Press Club-ah District Information & Public Relations Office leh Mizoram Journalists' Association (MJA), Lawngtlai District tang kawpin an buatsaih.

Press Accreditation Card hi Lawngtlai Bawrhsap & District MJA Patron Pu David Lalthantluanga chuan Lawngtlai District-a accredited journalist mi pasarih hnenah a hlan a. Sawrkarin accredited journalist nihna a pekte chu lawmpuina leh duhsakna hlanin, an hna thawhna leh an khawsaziaah accredited journalist nihna vawng nung a, chawi sangtu nih tum turin a chah a. District Administration-in Lawngtlai District MJA te thawhpuina tha tak an dawng thin chu lawmawm a tih thu sawiin, District hmasawn nan thawh hopui zel turin a sawm a. Social media-ah thuthang dik lo leng vel a tam thin avangin thu dik zawk puanzarna leh mipui zirtirna kawngah accredited journalist leh MJA member-te chuan mawhphurhna an nei sang zual tih sawiin, khawvel thang zel ruala District mipuite'n hma an sawn ve theih nan chanchinbu mite'n an chanchinbu leh media kal tlanga mipui zirtirna an puanzar tam a pawimawh thu a sawi bawk.

He hun hi District MJA Vice President Pu Elvis Lalthangzuala chuan kaihruaiin, Phawngpui Express Editor Pu ZD Dengngura'n tanna tawngtai a hmang a. Lawngtlai District Information & Public Relations Officer (DIPRO) Pu C. Lalhruaitluanga chuan accredited journalist nihna pek dan sawifiahin, accredited journalist tharte fuihna thu a sawi a. District MJA President Pu Lalngheta Ralte chuan District MJA member mi 10 zinga mi 7 lai mai accreditation pek an nih avanga sawrkar chunga an lawm thu sawiin, ram hmasawn nan sawrkar thawhpui tura an inhawn reng thu a sawi bawk.

Lawngtlai District-a accredited journalist vawiina PAC hlante chu - Pu V. Lallianzuala, Editor, Lairam; Pu ZD Dengngura, Editor, Phawngpui Express; Pu Lalngheta Ralte, Editor, The Lawngtlai Post; Pu H. Lalrinmawia, Editor, Rameng; Pu Elvis Lalthangzuala, Editor, Rauthla; Pu Lalchharliana, Correspondent, Zonet Cable TV leh Pu FC Vanlalzawna, Editor, Chhawkhlei Times te an ni a. Press accreditation hi kum hnih chhung atana inpek niin, tun tuma PAC inhlan hi March 2025 thleng a nung dawn a ni.

Press Accreditation Card sem zawh hian journalists' workshop buatsaih zui nghal a ni a. DIPRO Pu C. Lalhruaitluanga chu resource person niin, "journalism leh tunlai khawvel" tih thupui hmangin journalist-te dinhmun leh hma sawnna tur leh tan lakna tur hrang hrangte ngaihtuah ho leh sawi hovin hlawk taka hun hman a ni.