10742023-2024

Aizawl, the 7th July 2023 : Labour, Employment, Skill Development & Entrepreneurship (LESDE) Department enkawltu Minister Pu Lalchhandama Ralte chuan vawiin khan MINECO ah LESDE Directorate Building sak thar leh he Building a awm Mizoram Building & Other Construction Workers’ Welfare Board (MBOCWWB) hnuaia Multipurpose Centre te chu a hawng a. Department in thalai hna zawngte tana Mobile App an siam Employment Exchange(EMPEX) Mobile App pawh a tlangzarh nghal a ni.

LESDE  Minister Pu Lalchhandama Ralte chuan LESDE  Department chuan mipui hriat a hlawh chho mek leh thalai te tana nasa taka hna thawk mekin Department pawimawh leh tangkai tak a nih chhoh mek dan te sawiin, thalai te hmasawnna atan te, an thiamna skills tihpun kawngah leh an chhawr tangkai dan te, Mizoram leh ramchhung nilo ram pawn thleng hna an thawh theih nana remchanna hrang hrang a siamsak bakah kuthnathawktu building leh contruction workers te tan MBOCWWB kaltlanga hna a thawh dan enin LESDE Department chu thalai te Department tih hial theih a ni, a ti a. Labour & Employment Department a nih laia mi thenkhatin Department ral mek leh hnathawh tur nei tlem tia an sawi thin chu tunhnaia Department in huang a zauh hnu leh Sawrkarin mawhphurhna a pek belh heng - thiamna hrang hrang buaipuitu leh mahni kutkawih hmanga ei zawn tumtute dawmkangtu bakah kuthnathawktu building leh contruction workers te hmakhua ngaihtuahtu mawhphurhna pek an nih atangin Department chu nasa taka thangin Mizoram leh thalai te tan kawng tin rengin hmasawnna hrang hrang a thlen mek thu te a sawilang a ni.

Minister chuan tunhmain Department chu hmun 4 laiah mimal in luahin an lo awm thin a, mahse tunah chuan mahni pualin Office Building tha tak an nei ta a, hnathawktu zawng zawng te a tihphur ngei a beisei thu sawiin, Mizo mipui leh thalai te hmasawnna leh hmakhua atan tun aia nasa zawka hna kaltlangin an luanchhuah tam a beisei thu a sawi bawk a ni. Tunlai khawvelah skill development pawimawh dante sawiin Department pawh hemi kawngah hian nasa taka thawkin nuikum khan Ram pumah Skill development than chakna lawmman pawh an la a, chu mai nilovin All India Level ah pawh Skills Competition ah mizo thalai ten Gold Medal an la thei hian skill development lamah kan theihna leh thlen chin min hriattir a, hei hian kan thalai te a tiphur hle a, skill development leh entrepreneurship lamah hmasawnna a thlen belh zel ka beisei, a ni, a ti.

LESDE Office hawnnaah hian Government Chief Whip Pu Lalrintluanga Sailo leh Vice Chairman SEDP Manpower Development Board Pu Zothantluanga te pawh telin thu an sawi bawk a ni.

LESDE Office thar hawnna inkhawm hi Pu Lalramsanga Sailo, Secretary, LESDE  Department chuan kaihruaiin Department chanchin leh tunhnaia Department in hmasawnna tam tak a neih te a sawi a, Pi Angela Zothanpuii Director, LESDE chuan lawmthu a sawinaah Department chu thalai te chhawr tangkai mek leh thiamna skill an hmuh kawnga kawng kawhhmuhtu pawimawh tak a nih thute a tarlang a. Building sak dan leh a chanchin Technical Report hi Pu Lalmuanpuia Fanai, Deputy Director, LESDE leh Asst. Secretary in a tarlang a ni.

LESDE  Directorate leh Multipurpose Centre hi Building khat niin Mizo chhiar danin chawng 9 a ni a, kawng an hnuai lamah chawng 6 awmin kawng an chunga chawng 2 a awm a. Kawng an hnuai lam floor ah hian Skill Development leh Entrepreneurship lama training na hmun tur te leh trainees te thlen theihna hostel te, car parking te a awm a. Kawng an leh a chung lamah Directorate Office a awm a ni. Lift mi 8 chhuan theihna te, rualbanlo te tan ramp leh inthiarna hran bakah ruahtui khawlna leh nizung hmanga building eng mamawh siamchhuah solar panel te dah a nib awk.

Building hi cheng vaibelchhe 15 senga sak niin a sak nan Mizoram Sawrkar sum hman a ni lova. Director General (Labour Welfare)  Ministry of Labour & Employment in “Model Welfare Scheme for Building & Other Construction Workers” rawn siamin he scheme hnuaia hian infrastructure siam phalna an rawn dah a.  Mizoram Building & Other Construction Workers Welfare Board meeting vawi 27-na 19th March, 2020 a neih chuan he scheme hnuaia hian Multipurpose Centre,  Rs. 15 crore project, kum thum chhunga sak a rel ta a ni. He Multipurpose Centre sak nan hian Model Scheme in a sawi angin kumtin labour cess tlingkhawm atanga za zelah 20  chu Welfare Board Budget ah kum 2021-2022 atang khan Board chuan a dah ta, chuan he sum hmang hian sak a ni ta a ni. Kum thum chunga sak zawh tura inrem chu a hun hma kum hnih leh a chanve  sak zawh a ni a, a satute hi C B Engineering te an ni.