Vawiin khan Lawngtlai District Rural Development Agency (DRDA) huaihawtin ram leilung hausakna enkawl dan zir hona (orientation workshop on natural resources management) chu Lawngtlai DC Conference Hall-ah buatsaih a ni.

He hun hi Lawngtlai DC Dr A. Muthamma IAS chuan a hawng a. Lawngtlai District mipui tam zawk chu agriculture-a innghat an la nih avangin agriculture lama thar chhuah tam dan tur chu ngaihtuah bera neih a tul a ni, a ti a. Thingtlang mi rethei leh harsa zawkte khai chhuah nan department hrang hrang thawh ho that a pawimawh a, buh leh bal, thei leh thlai thar chhuah tam nan tui lak tha leh ram leilung enkawl uluk a pawimawh a ni, a ti.

Lawngtlai DRDA Project Director Pu R.Lalremsanga MCS chuan kal khawmte lawmna thu a sawi a. Hmasawn duh vanga ram leilung hausakna kan chen nasat avangin a chereu chak em em a; rualkhai leh daih rei zawka hmasawnna hna kan thawh theih nan ram leilung hausakna hi enkawl uluk a tul a ni, a ti.

He workshop-ah hian SIRD Extension Centre, Pukpuia Faculty Member Pu F.Vanlalzama chuan natural resources management chungchang leh MGNREGS leh PMKSY hnuaia hna thawh dan tur te a zirtir a. Sawi hona leh zawhna leh chhanna hun hman nghal a ni.

He workshop hian a tum ber chu ram leilung hausakna - ramngaw, thing leh mau, lui tui leh leitha te uluk taka enkawl a, a chhe tawh leh hman tlak tawh lote pawh siam thata chei that leh dan tur leh a pawimawhna te hriat chian a ni a. Chumi atana hma laknaa department hrang hrangte thawh ho dan tur te pawh zir ho a ni bawk.

Workshop-ah hian line department hrang hrang Agriculture, Horticulture, Soil & Water Conservation, Fisheries, BDO, KVK Lawngtlai, PMKSY-WDC leh MGNREGA staff-te an kal khawm a. Assistant Project Officer (WD) Lalramliani'n lawm thu sawiin workshop hi khar a ni.