Transport Minister Pu John Rotluangliana chuan nimin khan Bairabi -Sairang rel kawng laih hna thawh mek chu a hmunah kalin a endik a, Minister hi Pu TT Zothansanga, Parliamentary Secretary, Pu Hmingdailova Khiangte, Parliamentary Secretary, ZOHANDCO Chairman Pu R. Vanlalvena, Zonal Railways Users’ Consultative Committee (ZRUCC) Member ni bawk leh Mizoram Sawrkarin Railways Consultant atana a ruat Pu Hrangtawna, IRTS (rtd.) bakah Aizawl leh Kolasib atang Sawrkar official leh chanchinbumi engemaw zatin an tawiawm a ni.

Transport Minister hian Bairabi Railway Station tlawh hmasa berin North-East Frontier Railway hotuten an lo dawngsawng a, Bairabi Railway Station atanga bultan in Hortoki Railway Station thlenga Rel kawng sial mek a hmunah a en a, Tunnel an verh te pawh a hmunah tlawhin an hnathawh dan te a endik bakah Lei dawh na tur hmun te leh an hmalak dan te chik takin a en a ni.

Bairabi leh Sairang inkar Rel kawng hi kilometer 51 a ni dawn a, Rel kawng sial na atana sum ruahman zat chu cheng vaibelchhe 2384.34 niin Rel kawng sialna atan hian ram hectare 467.37 a zau lak a ni bawk. Kolasib District ah Rel kawng hi kilometer 40 a thui a kal ang a, Aizawl District ah kilometer 11 a thui a kal bawk ang. Bairabi – Sairang rel kawng hi rel kawng lian chi (Broad Gauge) ani dawn a Railway Station pali : Hortoki, Kawnpui, Mualkhang leh Sairang siam tur niin Hortoki, Kawnpui, Mualkhang ah te platform pahnih theuh leh Rail lines pathum theuh a awm ang a, Sairang Terminal Railway Station ah hian platform pathum awmin Rail lines pakua a awm bawk ang. Bairabi leh Sairang inkar rel kawng ah hian leiverh (tunnel) 23 awm tura ruahman a ni a, heng leiverh zawng zawng belhkhawm thui zawng hi metre 9487 (9.487 kms) zet a tling dawn a, tunah hian lei verh awm tur 23 zinga 17 ah hna thawh mek niin Tunnel sei ber tur kilometer 1.76 a thui Tunnel No. 1, Bairabi Railway Station bul ami chu an verh tlang tawh nghe nghe a, leiverh hna hi zaa 70 vel thawh zawh tawh a ni a, leiverh dan chi thar “New Austrian Tunnelling Method” hmanga verh a ni. Lei (Bridge) hi 130 dawh tur a ni a, heng zinga 44 hi Major bridge an ni dawn a, Maojor bridge 13 dawh mek niin lei dawh hna hrim hrim hi zaa 8 an thawk tawh a ni.

North-East Frontier Railway Deputy Cief Engineer S.P. Dineshmukh chuan rel kawng sial hna thawh mek ah earth work hi zaa 76 (76%) vel thawh zawh tawh anih thu a sawi a, rel kawng laihin a paltlang tur ram neitute nena harsatna an tawh te chinfel chhung a rei avanga hnathawh tan lawk theih anih takloh avang lehn fur ruahtui tam avanga hnathawhna hun (working season) a tlem avangin 2019 December a hnathawh zawh hman an tum pawh kum 2020 ah zawh anih a rinawm zawk thu a sawi.

Transport Minister Pu John Rotluangliana chuan Rel kawng laih hna thawh mek chu an hmalak chinah lungawithlak thawkhata a hriat thu sawiin hnathawktute pawh theihtawpa tan la turin a ngen a, Rel kawng chu Mizoram hmasawnna kawnga thawhhlawk tak tur anih dawn thu pawh sawiin leiverh leh Lei dawh mawi tak tak awm tur te pawh khualzin hiptu tha tak an nih ngei a rin thu a sawi bawk.

Transport Minister hi Hortoki khawtlang mipuiten lo hmuakin an khaw panna kawng ber Hortoki-Kawnpui kawng chu Rel kawng sialna hmanraw phurh nana hman anih avanga a chhiat tak thu leh fur lo thlen huna buhfai thiar a harsat dawn thu an lo thlen a, Minister chuan Hortoki khaw mipuite chu thlaphang lo tura chahin fur ruahtui tlak hma in an buhfai mamawh zat chu an khua ah chhekkhawl sak an nih tur thu a hrilh a, Kawnpui-Hortoki inkar kawng chungchang pawh Pu Hrangtawna, Railway Consultant chuan sawifiahin NF Railway thuneitu liante nen pawh sawiho tawh anih thu leh fur ruahtui tlak hma a kawng chu siamthat anih dawn thu khaw mipuite a hrilh a ni.